धरान/ धरानको खेलकुद इतिहासमा नयाँ अध्याय थप्दै २५औँ गोधुली रनिङ कप फुटबल प्रतियोगिता पहिलो पटक रात्रिकालीन खेल सहित आयोजना गरिने भएको छ। प्रतियोगिता भोलि, चैत्र ७ गतेदेखि धरान रंगशालामा सुरु हुनेछ।
धरान उपमहानगर अन्तर वडा प्रतियोगिताको २५औँ संस्करण यस पटक गोधुली टेस्टि टेस्टी नुडल्स फुटबल प्रतियोगिता को रूपमा सम्पन्न हुने आयोजकले बुधबार पत्रकार सम्मेलनमार्फत जानकारी गराएको हो। प्रतियोगिता चैत्र २१ गतेसम्म सञ्चालन हुनेछ।
रात्रिकालीन खेलको सुरुवात
धरानको फुटबल इतिहासमै पहिलो पटक रातिको खेल खेलाउन फ्रन्ट लाइटको व्यवस्था गरिएको छ। उद्घाटन दिन बिहीबार साँझ ७ बजे पहिलो खेल वडा नम्बर ५ र वडा नम्बर १६ बीच हुनेछ।
उद्घाटन समारोह भव्य हुने
गोधुली क्लबका उपाध्यक्ष सतिश केसीका अनुसार प्रतियोगिताको उद्घाटन धरान उपमहानगरपालिका वडा नम्बर १७ का अध्यक्ष मनोज भट्टराई ले गर्नेछन्। साथै, उद्घाटन समारोहमा चर्चित गायक पूर्ण राई एण्ड दाजुभाइ ले सांगीतिक प्रस्तुति दिनेछन्।
प्रत्याशित पुरस्कार राशी
धरान वडा नम्बर १८ का अध्यक्ष नरेन्द्र कुमार राई (प्रविण) ले विजेता र उपविजेताका लागि २५र२५ हजार रुपैयाँ थप्ने घोषणा गरेका छन्।
सन् २०५० देखि सुरु भएको गोधुली रनिङ कप धरानको प्रतिष्ठित फुटबल प्रतियोगिता हो। अघिल्लो संस्करणमा वडा नम्बर १३ च्याम्पियन बनेको थियो भने २३औँ संस्करणको विजेता वडा नम्बर १७ रहेको थियो।
प्रतियोगिताको कुल अनुमानित खर्च २४ लाख १८ हजार ३३ रुपैयाँ रहेको आयोजकले जानकारी दिएको छ।
धरानवासी फुटबलप्रेमीहरूका लागि यो प्रतियोगिता रात्रिकालीन फुटबलको रोमाञ्चक अनुभव दिनेछ, जसले खेलाडीहरूको क्षमता उजागर गर्न थप योगदान पुग्नेछ।
