विराटनगर/ मोरङको धनपालथान गाउँपालिका–७, कदमा मुस्लिम टोलमा भएको आगलागीमा निधन भएकी चार वर्षीया बालिकाको परिचय खुलेको छ। घटनामा अनित मियाकी छोरी रेश्मा खातुनको जलेर मृत्यु भएको प्रहरीले जनाएको छ।
साथै, अर्को एक बालकको पनि निधन भए पनि उनको परिचय खुल्न बाँकी छ।
प्रारम्भिक अनुसन्धानअनुसार आगलागी विद्युत् सर्टका कारण भएको आशंका गरिएको छ।
आगो दिउँसो १२:३० बजेदेखि सुरु भएको थियो। अत्यधिक घाम र हावाका कारण आगो नियन्त्रणमा समस्या हुँदा उक्त टोलका आठ घर जलेका छन्।
आगो नियन्त्रणका लागि स्थानीय, प्रहरी तथा रंगेली नगरपालिका, कानेपोखरी गाउँपालिका, बेलबारी नगरपालिका, पथरी शनिश्चरे नगरपालिका र विराटनगर महानगरपालिकाका पाँच वटा दमकल परिचालित भएका थिए।
घटनास्थलमा मोरङका प्रमुख जिल्ला अधिकारीसहितको टोली पुगेको छ भने केही समयअघि नेपाली सेनाको टोलीले पनि आगो नियन्त्रणमा सहायता गरेको छ।
