भेडेटारको स्काई वाक टावरले होटल व्यवसायमा सुधार

धनकुटा/  धनकुटाको पर्यटकीय नगरी भेडेटारमा गत साउनदेखि सञ्चालनमा आएको स्काई वाक टावरले यहाँका होटल व्यवसायीलाई राहत प्रदान गरेको छ।

कोरोना महामारी र आर्थिक मन्दीका कारण प्रभावित भएको होटल व्यवसाय टावर सञ्चालनपछि सुधारोन्मुख भएको व्यवसायीहरूको भनाइ छ।

होटल व्यवसायीहरू आशावादी

होटल अरुण टपका सञ्चालक रमेश श्रेष्ठका अनुसार, “कोरोना अघिको जस्तो व्यापार छैन, तर स्काई वाक टावर बनेपछि कोरोनाकालको तुलनामा राम्रो भएको छ।” १८ वर्षदेखि होटल व्यवसायमा रहेका श्रेष्ठले व्यापार बिस्तारै उकालो लाग्ने विश्वास व्यक्त गरे।

यस्तै, होटल लावती कर्नरका सञ्चालक लीलाराज लावतीले पनि महामारीपछि सुस्ताएको व्यवसाय टावर सञ्चालनपछि पुनः चलायमान बन्दै गएको बताए।

“यदि भेडेटारका अन्य पर्यटकीय स्थलहरूको पनि प्रचारप्रसार गर्न सकियो भने यहाँको व्यापारिक साख पुरानै अवस्थामा फर्कन सक्छ,” लावतीको भनाइ छ।

स्काई वाकको शुल्क महँगो भएको गुनासो

होटल एशोसिएसन भेडेटारका अध्यक्ष तुमराज लिम्बूका अनुसार स्काई वाक टावर सञ्चालनपछि व्यवसायमा सुधार देखिए पनि प्रवेश शुल्क महँगो भएकाले सोचे जति पर्यटक आकर्षित गर्न नसकेको गुनासो छ।

हाल भेडेटारमा पर्यटक लक्षित एक सयभन्दा बढी सुविधा सम्पन्न होटल तथा करिब दुई सय साना होटल सञ्चालनमा छन्।

साँगुरीगढी गाउँपालिका धनकुटा र धरान उपमहानगरपालिकाको सिमानामा निर्मित स्काई वाकले भेडेटारको पर्यटन तथा व्यापार प्रवर्द्धनमा महत्त्वपूर्ण योगदान दिएको गाउँपालिका अध्यक्ष जितेन्द्र रुम्दाली राईले जानकारी दिए।

२० करोड लगानी, १.५ लाख पर्यटकको अवलोकन

कोशी प्रदेश लगानी बोर्ड र वण्डर्स ग्रुप अन्तर्गत वण्डर्स एम्युजमेन्ट पार्क्स एण्ड अट्रयाक्सन्स प्रालिको २० करोड लगानीमा निर्माण भएको स्काई वाक टावर गत साउन १ गतेदेखि सञ्चालनमा आएको हो।

सञ्चालक कम्पनीका प्रबन्ध निर्देशक सन्जिव रोकायाका अनुसार फागुनसम्ममा १ लाख ५० हजारभन्दा बढी पर्यटकले स्काई वाकको अवलोकन गरिसकेका छन्। उनले हालसम्म टावरबाट ५ करोडभन्दा बढीको कारोबार भइसकेको जानकारी दिए।

भेडेटारको पर्यटन प्रवर्द्धनका लागि थप नयाँ योजनाहरू आवश्यक रहेको बताउँदै स्थानीय व्यवसायीहरू सरकारले भेडेटारलाई अझ व्यवस्थित पर्यटकीय गन्तव्य बनाउनुपर्ने माग गरिरहेका छन्।