_1693980289.gif "#")
धरान/ सडक दुर्घटनाका कारण स्पाइनल कर्ड इन्जुरी भई दश वर्षदेखि थलिएका मजदुर पुण्य प्याकुरेललाई कतारमा कार्यरत यातायात मजदुर सुशील पोखरेलले दश हजार रुपैयाँ आर्थिक सहयोग गरेका छन्।
नेपाल यातायात स्वतन्त्र मजदुर संगठनका केन्द्रीय अध्यक्ष भीमज्वाला राईको उपस्थितिमा बिहीबार पुण्य प्याकुरेलकै निवासमा पुगेर पोखरेलले सहयोग हस्तान्तरण गरेका हुन्।
संगठनका सदस्य समेत रहेका पोखरेल धरान–१५ का स्थायी बासिन्दा हुन्।
हाल उनी कतारको अवेन्सल लाइटिङ कम्पनीमा लाइटिङ विशेषज्ञका रूपमा कार्यरत छन्।
सहयोग हस्तान्तरण कार्यक्रममा पोखरेलले आफू पनि यातायात मजदुर भएकाले पीडित मजदुरको अवस्था देखेर सहयोग गरेको बताए। "पहिले पनि सहयोग गरेको थिएँ, फेरि पनि सहयोग गर्छु," उनले भने।
उक्त अवसरमा नेपाल पत्रकार महासंघ सुनसरीका अध्यक्ष सन्तोष काफ्ले, प्रेस चौतारी नेपाल सुनसरीका अध्यक्ष विकास चाम्लिङ, नेपाल यातायात स्वतन्त्र मजदुर संगठन धरानका अध्यक्ष किरण थापा लगायतको उपस्थिति रहेको थियो।
२०७२ साल असार १५ गतेको सडक दुर्घटनापछि स्पाइनल कर्ड इन्जुरी भएका प्याकुरेल परिवार हालसम्म संघर्षरत छन्।
छोरा, छोरी र श्रीमती सहित भाडामा बस्दै आएका उनीहरूको लागि संगठनका अध्यक्ष भीमज्वाला राईको पहलमा तथा सञ्चारकर्मी एवं विभिन्न सहयोगदाताहरूको साथमा २०७५ सालमा घर निर्माण गरिए पनि परिवारको दैनिकी चलाउन र छोराछोरीको शिक्षाका लागि अझै सहयोग आवश्यक रहेको छ।
