वराहक्षेत्र मेयर लिग : साविक विजेतामाथि वडा नं ९ को सनसनीपूर्ण जित संगम बिष्ट

वराहक्षेत्र/ वराहक्षेत्र नगरपालिकामा जारी तेस्रो संस्करणको वडा स्तरीय वराहक्षेत्र मेयर लिग कप रनिङ्ग शिल्ड फुटबल प्रतियोगिता अन्तर्गत शुक्रबार सम्पन्न अन्तिम क्वाटरफाइनल खेलमा वडा नं ९ ले साविक विजेता वडा नं १ लाई पराजित गर्दै सेमिफाइनल यात्रा तय गरेको छ।

समूह 'ए' बाट दोस्रो हुँदै क्वाटरफाइनलमा प्रवेश गरेको वडा नं ९ ले समूह 'बी' बाट दोस्रो भएको साविक विजेता वडा नं १ लाई १–० को रोमाञ्चक जित दर्ता गर्दै प्रतियोगिताबाट बाहिर पठायो।

निर्णायक गोल गर्दै टिमलाई ऐतिहासिक जित दिलाएका शम्भु चन्द्रवशी खेलको म्यान अफ द म्याच घोषित भए।

उनले नगद २,१०० रुपैयाँसहित ट्रफी प्राप्त गरे।

अब सेमिफाइनलमा वडा नं ९ ले वडा नं ५ संग प्रतिस्पर्धा गर्नेछ। वडा नं ५ ले क्वाटरफाइनलमा वडा नं ४ लाई पराजित गर्दै अन्तिम चारको यात्रा तय गरेको थियो।

शनिबार हुने पहिलो सेमिफाइनल खेलमा वडा नं २ र वडा नं १० आमनेसामने हुनेछन्। वडा नं २ ले वडा नं ८ लाई र वडा नं १० ले वडा नं ३ लाई पराजित गर्दै सेमिफाइनलको यात्रा तय गरेका थिए।

नगर खेलकुद विकास समितिको आयोजनामा जारी प्रतियोगिता वराहक्षेत्र नगरपालिका वडा नं ७, देविघाटस्थित वसन्त ऋतु माध्यमिक विद्यालयको खेलमैदानमा भइरहेको छ।

"खेलकुद हाम्रो सान, खेलाडी उत्पादन गर्ने हाम्रो अभियान" भन्ने नारासहित आयोजना गरिएको यो प्रतियोगिताले युवा खेलाडीहरूलाई आफ्नो प्रतिभा देखाउने महत्वपूर्ण अवसर प्रदान गरिरहेको छ।