_1693980289.gif "#")
धरान ।उपमहानगरबासी भएर पनि उपेक्षामा परेको साविकको पाँचकन्या र विष्णुपादुमा रहेका ग्रामीण भेगको जनताको काम र सरोकारवाला निकायलाई ध्यानकर्षण गराएर अघि बढ्नको लागि धरान ६ पानवारीका राजनीतिक दलहरु एक ढिक्का भएका छन् ।
धरान उपमहानगरवासी भएर पनि उपेक्षामा परेको भन्दै त्यहाँ रहेका सवै दलहरु एक ढिक्का भएर अघि बढ्नको लागि राजनीतिक पार्टीको सर्वदलीय संयन्त्र शनिबार भएको सर्वदलीय भेलाद्धारा गठन भएको छ । उक्त भेलाले हाललाई पार्टीबाट दुई,दुई जना प्रतिनिधित्व गर्ने गरी सर्वदलीय सम्यन्त्र बनाउन तदर्थ समिती गठन गरेको बताइएको छ ।
नेपाली काँग्रेस ६ नम्बर वडा समितीको संयोजनमा उक्त भेला सम्पन्न भएको हो । पार्टी सभापति भुपाल राईका अनुसार ग्रामीण भेगमा रहेको ४ वटा वडाहरुको जनताको पीर मर्का र विकास निर्माणको लागि संवन्धित निकायलाई झक्झकाएर उपमहानवासीको अनुभुति गराउनको लागि प्रयास थालिएको बताए । उनले भने,“उपेक्षामा हामी ग्रामीण भेगका जनताहरु परियो,सिंगो धरानको अनुभुति गर्न पाइएन,अब यो संयन्त्रले स्थानीय तह,प्रदेश र संघ सम्म जोडनको लागि पुलको काम गर्दछ,सवैको साथ र सहयोगको अपेक्षा पनि गरेका छौ।”
नेकपा एमालेका ६ नम्बर वडा कमिटी अध्यक्ष एवम् सर्बदलीय सम्यन्त्रको तदर्थ समिती समेत रहेका हरि राईले संयन्त्र बन्नु मात्रै ठुलो कुरा नभएको काम चाहिँ हेर्न बाँकी रहेकाले अहिले त सकरात्मक होला तर रिजल्ट भने हेर्न बाँकी रहेका बताए ।वडामा वेथिती र विसंगती अनि भ्रष्टचारको जालो तोडेर अघि बढ्ने र समग्र जनमुखी विकासमा काम गर्ने हो भने सम्यन्त्र वनेको अर्थ हुने राईले बताएका छन् ।
सर्वदलीय सम्यन्त्रमा हाललाई नेपाली काँग्रेसबाट वीर बहादुर कार्की र भुपाल राई,नेकपा माओबादी केन्द्रको तर्फबाट रमेश कटवाल र मचिन्द्र तामाङ,नेकपा एमालेको तर्फबाट हरि राई र राम काफ्ले रहेका छन भने राष्ट्रिय स्वतन्त्र पार्टीको तर्फबाट पदम पौडेल र मचिन्द्र गुरुङ रहेको तदर्थ समिति बनेको छ ।नेकपा माओबादी केन्द्रका नेता रमेश कटवालले पनि संयन्त्र बनेको प्रति समर्थन गर्दै एक्यवद्धता जनाएको बताए ।
सकारात्मक नै देखियो,पहलकदमी गरियो भने राम्रो नै हुनेछ,कम्तीमा वडाको विकासको लागि दलीय आडमा भन्दा निष्पक्ष ढंगले काम गरिएको खण्डमा सुधार हुने अपेक्षा रहेको छ,नेता कटवालको भनाई छ । उनका अनुुसार हाललाई ६ नम्बर वडाको सुधारको लागि काम गर्दै अघि बढ्ने हो भने आगामी दिनमा सवै वडामा काम गर्न सकिने र यहाँको जनप्रतिनिधी सहित नै खानेपानी,स्वास्थ्य,शिक्षा र समग्र विकासको पाटोमा हातेमालो गर्ने लक्ष्य भएको बताए ।
तदर्थ समिती मार्फत फेरी बृहत भेला गरि संयोजक तोकेर काम गर्ने बताइएको छ ।सर्व दलीय सम्यन्त्रले पुर्णता भएपछि जनप्रतिनिधीलाई खवरदारी गदै केन्द्र सम्म जोड्ने दिर्घकालिन योजना बनाउने लक्ष्य लिएको काँग्रेस सभापति राईको भनाई छ ।
