वराहक्षेत्र मेयर लिग कप फुटबल: वडा नं. १ र ५ विजयी संगम बिष्ट

वराहक्षेत्र/ वराहक्षेत्र नगरपालिकामा जारी तेस्रो संस्करणको वडा स्तरीय वराहक्षेत्र मेयर लिग कप रनिङ्ग शिल्ड फुटबल प्रतियोगिता अन्तर्गत शुक्रबार भएका खेलहरूमा वडा नं. १ र वडा नं. ५ विजयी भएका छन्।

प्रतियोगिताको पहिलो खेलमा साबिक विजेता वडा नं. १ ले वडा नं. १० लाई ३-० को फराकिलो अन्तरले पराजित गर्दै लगातार दोस्रो जित दर्ता गर्यो।

यस जितसँगै वडा नं. १ ले तीन खेलमध्ये दुई खेलमा जित र एक खेलमा पराजयसहित ६ अंक जोडेको छ।

भने, लगातार दुई खेलमा पराजित भएको वडा नं. १० अंकविहीन बनेको छ।

खेलमा एक गोल गरेका वडा नं. १ का छेङ्बिहाङ राई ‘म्यान अफ द म्याच’ घोषित भए। उनले नगद २ हजार १ सय रुपैयाँसहित ट्रफी प्राप्त गरे।

त्यस्तै, दोस्रो खेलमा वडा नं. ५ ले वडा नं. ६ लाई ३-० को अन्तरले पराजित गर्दै लगातार तेस्रो जित निकाल्यो।

यो जितपछि वडा नं. ५ समूह विजेता बन्दै नकआउट चरणमा प्रवेश गरेको छ। वडा नं. ६ भने लगातार दुई खेल गुमाउँदै अङ्कविहीन रहेको छ।

खेलमा तीन गोल गर्दै ह्याट्रिक पूरा गरेका वडा नं. ५ का अर्जुन कुँवर ‘म्यान अफ द म्याच’ घोषित भए। उनले नगद २ हजार १ सय रुपैयाँसहित ट्रफी प्राप्त गरे।

लिग फर्म्याटमा भइरहेको प्रतियोगिता अन्तर्गत शनिबारको खेलमा पहिलो प्रतिस्पर्धा वडा नं. २ र वडा नं. ४ तथा दोस्रो खेल वडा नं. ३ र वडा नं. ७ बीच हुनेछ।

नगर खेलकुद विकास समितिको आयोजनामा वडा नं. ७, देवीघाटस्थित वसन्त ऋतु माध्यमिक विद्यालयको खेलमैदानमा जारी प्रतियोगिताले "खेलकुद हाम्रो सान, खेलाडी उत्पादन गर्ने हाम्रो अभियान" नारालाई आत्मसात् गरेको छ।