चतरा/ वराहक्षेत्र नगरपालिकामा जारी तेस्रो संस्करणको वडा स्तरीय वराहक्षेत्र मेयर लिग कप रनिङ्ग शिल्ड फुटबल प्रतियोगिताू अन्तर्गत बिहीबार सम्पन्न खेलमा वडा नं ७ र वडा नं ९ को खेल बराबरीमा टुंगिएको छ। निर्धारित र अतिरिक्त समयसम्म एक-एक गोलमा रोकिएपछि दुवै टोलीले १-१ अंक बाँडेका छन्।
यस बराबरीसँगै दुई खेल खेलेको वडा नं ७ ले १ अंक मात्र जोड्न सकेको छ भने वडा नं ९ ले १ जित र १ बराबरी गर्दै ४ अंक पुर्याएको छ। खेलमा उत्कृष्ट प्रदर्शन गरेका वडा नं ७ का सोहन बस्नेत म्यान अफ द म्याच घोषित भए। उनले नगद २,१०० रुपैयाँसहित ट्रफी प्राप्त गरे।
त्यस्तै, बिहीबारकै दोस्रो खेलमा वडा नं ३ ले वडा नं ८ लाई ३(० को फराकिलो अन्तरले पराजित गर्दै प्रतियोगितामा पहिलो जित दर्ता गराएको छ। पहिलो संस्करणको विजेता वडा नं ३ का अनिसहाङ लिम्बुले २ गोल गर्दै टोलीको जितमा मुख्य भूमिका खेले। उनी म्यान अफ द म्याच घोषित भए र नगद २,१०० रुपैयाँसहित ट्रफी प्राप्त गरे।
प्रतियोगिता लिग फर्म्याटमा जारी रहेको छ। शुक्रबारको खेल अन्तर्गत पहिलो खेल वडा नं १ र वडा नं १० तथा दोस्रो खेल वडा नं ५ र वडा नं ६ बीच हुनेछ।
नगर खेलकुद विकास समितिको आयोजनामा वडा नं ७, देबिघाटस्थित बसन्त ऋतु माध्यमिक विद्यालयको खेलमैदान मा प्रतियोगिता भइरहेको छ। खेलकुदलाई प्रवर्द्धन गर्ने उद्देश्यले खेलकुद हाम्रो सान, खेलाडी उत्पादन गर्ने हाम्रो अभियान भन्ने नारासहित प्रतियोगिता सञ्चालन गरिएको छ।
