धरान/आज महाशिवरात्री, भगवान शिवको विशेष दिन ।
कोशी प्रदेशभरका शिवालयझैँ धरान–१४ विजयपुरस्थित पिण्डेश्वर मन्दिरमा पनि विहानैदेखि भक्तजनहरूको घुइँचो लागेको छ।
महाशिवरात्रीलाई हिन्दू धर्मावलम्बीहरूको पवित्र पर्व मानिन्छ। धार्मिक ग्रन्थहरू अनुसार यो चार प्रमुख रात्रीहरूमध्ये एक हो, जसलाई ‘कालरात्री, मोहरात्री, सुखरात्री र शिवरात्री’ भनिन्छ।
यस दिन शिव पूजाअर्चना, व्रत बस्ने र दूध, धतुरो तथा बेलपत्र चढाउने परम्परा रहँदै आएको छ।
धरानको पिण्डेश्वर मन्दिरको धार्मिक महत्वका कारण यहाँ साउन महिनाको सोमबारझैँ शिवरात्रीमा पनि ठूलो संख्यामा भक्तजनहरू आउने गर्छन्।
मन्दिर व्यवस्थापन समितिले दर्शन व्यवस्थित बनाउन नेपाल प्रहरी, स्वयंसेवक तथा विभिन्न संस्थाहरूको सहकार्यमा लाइन तथा पानीको उचित व्यवस्था मिलाएको छ।
कोशी प्रदेशकी सांसद यशोदा कायस्थले पछिल्लो समय धार्मिक पर्यटकको चाप बढेको उल्लेख गर्दै "पर्यटन वर्ष २०८२" लाई लक्षित गरी धरानलाई धार्मिक पर्यटन गन्तव्यका रूपमा विकास गर्न सकिने बताइन्।
पिण्डेश्वर बाबाधाम समितिका अध्यक्ष विकास बनेपालीका अनुसार भक्तजनलाई सहज दर्शन गराउन सबै आवश्यक व्यवस्था मिलाइएको छ।
समितिका अनुसार प्रत्येक वर्ष महाशिवरात्रीमा भक्तहरूको संख्या बढ्दै गएको छ। धार्मिक विश्वासअनुसार सृष्टिको प्रारम्भमा यही रात मध्यरात्रिमा भगवान शिव रुद्रका रूपमा अवतरित भएका थिए।
धरान तथा आसपासका भक्तजनहरू मात्रै होइन, टाढा–टाढाबाट आएका श्रद्धालुहरू पिण्डेश्वर मन्दिरमा दर्शनका लागि लामबद्ध भइरहेका छन्।
