_1693980289.gif "#")
दुहबी/ महेन्द्र मेमोरियल एकेडेमी, दुहबी_४ ले प्रदेश स्तरीय चित्रकला प्रतियोगिता र सुनसरी प्याब्सनद्वारा आयोजित माध्यमिक प्लस टू जिल्लास्तरीय कबड्डी प्रतियोगितामा उल्लेखनीय सफलता हासिल गर्ने विद्यार्थीलाई एक विशेष कार्यक्रमका बीच सम्मान गरेको छ।
कसमस एजुकेशनल ट्रेनिङ एण्ड रिसर्च सेन्टर नेपालले आयोजना गरेको कोशी प्रदेश स्तरीय चित्रकला प्रतियोगितामा महेन्द्र मेमोरियल एकेडेमीकी छात्रा अलिसा खातुन प्रथम स्थान हासिल गर्न सफल भइन्।
उनले नगद रु १५ हजार, मेडल, प्रमाणपत्र र ट्रफी प्राप्त गरिन्।
कक्षा ५ मा अध्ययनरत खातुनले १० हजारभन्दा बढी प्रतिस्पर्धीलाई पछि पार्दै यो उपलब्धि हात पारेकी हुन्।
यस्तै, सुनसरी प्याब्सनले आयोजना गरेको जिल्लास्तरीय कबड्डी प्रतियोगितामा महेन्द्र मेमोरियल एकेडेमीका छात्राहरू दोस्रो स्थान हासिल गर्न सफल भए।
विद्यालय प्रशासनले सफल विद्यार्थीहरूलाई खादा, माला र सम्मानपत्रसहित सम्मान गरेको थियो।
विद्यालयका प्रिन्सिपल निश्चलराज शाक्यले छात्रा अलिसा खातुनको प्रशंसा गर्दै उनको उज्ज्वल भविष्यको कामना गरे। साथै, विद्यालयको प्रतिष्ठा उचाइमा पुर्याएको भन्दै खातुनलाई यस वर्ष पूर्ण छात्रवृत्तिको घोषणा समेत गरे।
महेन्द्र मेमोरियल एकेडेमी सुनसरीकै अब्बल शैक्षिक संस्था मध्येको एक मानिन्छ।
शिक्षासँगै फुटबल, भलिबल, वादविवाद, चित्रकला लगायत अतिरिक्त क्रियाकलापमा पनि विद्यालयका विद्यार्थीहरू सक्रिय छन्।
विद्यालयका अभिभावकहरू संस्थाको शैक्षिक र अतिरिक्त गतिविधिमा सन्तुष्ट रहेको प्रतिक्रिया दिएका छन्।
