_1693980289.gif "#")
धरान/ कोशी प्रदेश प्रिमियर लिगको उपाधी गाईघाट फुटबल क्लबले जितेको छ।
बिहीबार धरान रंगशालामा सम्पन्न फाइनल खेलमा पाँचथर युनाइटेड क्लबलाई ११–0 को फराकिलो अन्तरले पराजित गर्दै गाईघाटले लिग च्याम्पियन बन्न सफल भएको हो।
उपाधिसँगै गाईघाट राष्ट्रिय लिग छनोट प्रतियोगिता अन्तरगत अन्तर प्रदेश लिगमा छनोट भएको छ। त्यस्तै, दोस्रो स्थान हासिल गरेको धनकुटाको देउराली युथ क्लब पनि अन्तर प्रदेश लिगका लागि छनोट भएको छ।
कोशी प्रदेशका ११ जिल्लाका लिग च्याम्पियन क्लबहरू सम्मिलित प्रतियोगितामा टोलीहरूलाई ४ समूहमा विभाजन गरी समुह चरण तथा फाइनल चरण खेलाइएको थियो।
अन्ततः उदयपुरको गाईघाट फुटबल क्लबले ७ अंक प्राप्त गर्दै लिग च्याम्पियन बन्न सफल भयो।
धनकुटाको देउराली युथ क्लब ४ अंकसहित दोस्रो स्थानमा रह्यो भने खोटाङको बुइपा–11 क्लब समान ४ अंक प्राप्त गरे पनि गोल अन्तरका आधारमा तेस्रो स्थानमा सीमित रह्यो।
धनकुटाको गोल अन्तर ५ रहेको छ भने बुइपाको गोल अन्तर शून्य रहेको थियो। पाँचथर युनाइटेड क्लब १ अंकसहित चौथो स्थानमा रहन सफल भयो।
प्राप्त पुरस्कारहरू :
गाईघाटले लिग च्याम्पियन बन्दै नगद २ लाख रुपैयाँ पुरस्कार प्राप्त गर्यो। दोस्रो स्थान प्राप्त देउराली युथ क्लबले १ लाख ५० हजार, तेस्रो स्थानको बुइपा–11 ले १ लाख २५ हजार, र चौथो स्थानको पाँचथर युनाइटेड क्लबले १ लाख रुपैयाँ पुरस्कार प्राप्त गर्यो।
प्रतियोगिताका उत्कृष्ट खेलाडीहरू :
गाईघाटका कप्तान युवराज थापा प्रतियोगिताको उत्कृष्ट खेलाडी घोषित भए। उनलाई नगद ५० हजार रुपैयाँ प्रदान गरिएको थियो।
त्यस्तै, उत्कृष्ट गोलकिपर गाईघाटकै निम छिरिङ लामा घोषित भए भने उत्कृष्ट स्ट्राइकर प्रविन राई, उत्कृष्ट प्रशिक्षक किरण कुमार कार्की, उत्कृष्ट डिफेन्डर बुइपाका रामशुर राई र उत्कृष्ट मिडफिल्डर देउराली युथ क्लबका विपिन लिम्बू घोषित भए। यी खेलाडीहरूले जनही १५ हजार रुपैयाँ नगद पुरस्कार प्राप्त गरे।
