धरानमा ३०औं जनयुद्ध दिवसमा रक्तदान कार्यक्रम सम्पन्न

धरान/  नेकपा माओवादी केन्द्र धरान उपमहानगर समितिले ३०औं जनयुद्ध दिवसको अवसरमा रक्तदान कार्यक्रम आयोजना गरेको छ।

विहीबार बिहान धरानको भानुचौकमा सम्पन्न कार्यक्रममा माओवादी केन्द्रका नेता, कार्यकर्ता र शुभचिन्तकहरूले रक्तदान गर्दै जनयुद्धको स्मरण गरेका छन्। कार्यक्रमको प्रमुख आतिथ्य माओवादी केन्द्रका केन्द्रीय सदस्य अजम्वर काङमाङले गर्नुभएको थियो।

धरान नगर समितिले प्रत्येक वर्ष जनयुद्ध दिवसलाई रक्तदान कार्यक्रममार्फत मनाउँदै आएको छ। यस वर्ष १२२ पिन्ट रगत संकलन भएको नगर सदस्य जीवन राईले जानकारी दिनुभयो।

नगर समितिका अध्यक्ष उद्धव लिम्बुले जनयुद्ध दिवसका अवसरमा तीनवटा कार्यक्रम आयोजना गरिएको बताउनुभयो। रक्तदान कार्यक्रमपछि दिउँसो धरानभरका शहीद र बेपत्ता परिवारका घरमा सम्मान र साँझ दीप प्रज्वलन गरिने उहाँले जानकारी दिनुभयो।

वि.सं. २०५२ फागुन १ गतेबाट सुरु भएको जनयुद्ध २०६३ मङ्सिर ५ गते विस्तृत शान्ति सम्झौतामा परिणत भएको थियो। त्यही जनयुद्धको आधारमा नेपालमा राजनीतिक परिवर्तन सम्भव भएको हो। गणतन्त्र, संघीयता, समावेशी लोकतन्त्र र सामाजिक न्यायजस्ता उपलब्धिहरू जनयुद्ध र जनआन्दोलनको बलमा स्थापित भएका छन्।