स्वास्थ्य क्षेत्रलाई मर्यादित बनाउन प्रधानमन्त्रीको आग्रह "बीपीका विभिन्न संकायका ५ सय ५६ विद्यार्थी दक्षित"

गोविन्द वस्नेत

धरान । चिकित्सकको विरामी प्रतिको व्यवहारप्रति व्यापक जनगुनासो आइरहेकोप्रति प्रधानमन्त्री एवम् बीपी कोइराला स्वास्थ्य विज्ञान प्रतिष्ठानका कुलपति केपी शर्मा ओलीले चिकित्सा क्षेत्रलाई सेवामुलक बनाउन दिक्षित विद्यार्थीहरुलाई आग्रह गरेका छन् ।

प्रधानमन्त्री एवम् कुलपति ओलीले बीपी कोइराला स्वास्थ्य विज्ञान प्रतिष्ठानको १३ औ दीक्षान्त समारोहमा दिक्षित हुने विद्यार्थीहरुलाई दीक्षित गरिसकेपछि सो कुरा बताएका हुन् ।

उनले नेपालको चिकित्सा क्षेत्रमा धन कमाउने होडबाजी चलेकोप्रति इंगित गर्दै मुलुकमा शैक्षिक माफिया, स्वास्थ्य माफियाहरुले चलखेल गर्ने गरेकोले यस्ता कार्यलाई नेपाल सरकारले रोक्नका लागि हदैसम्मको कदम चल्ने बताए ।

उनले बीपी कोइराला स्वास्थ्य विज्ञान प्रतिष्ठान नेपालकै मात्र हैन दक्षिण एसियाकै प्रतिष्ठित अस्पताल भएकोले यहाँबाट दिक्षित हुने विद्यार्थीहरुबाट नेपाल र नेपालीले धेरै अपेक्षा गरेकोले अपेक्षा गरे अनुसारको काम गरेर अगाडि बढ्न पनि दीक्षित विद्यार्थीहरुलाई आग्रह गरे ।
यस्तै सहकुलपति एवम् स्वास्थ्यमन्त्री प्रदीप पौडेलले स्वास्थ्य क्षेत्रलाई सहज र सरल बनाउन अब नेपाल सरकारले सबै क्षेत्रलाई डिजिटल प्रविधिमा लान शुरु गरेको बताए । प्रतिष्ठानमा प्रत्येक दिन विरामीको चाप बढ्दै जाँदा यहाँ चाहिने दक्ष चिकित्सक, उपकरण लगायतका सेवा सुविधाको कमी नेपाल सरकारले महसुस गरेको बताए ।

उनले दीक्षित विद्यार्थीरुले आगामी दिनमा नेपालमा भएको स्वास्थ्य सेवाको दक्ष जनशक्तिलाई कमी हुन नदिने विश्वास समेत सबैले लिएको बताए ।
प्रतिष्ठानका उपकुलपति डा. ज्ञानेन्द्र गिरीले प्रतिष्ठानमा सेवा सुविधा थपिदै जाँदा पनि अझै सेवा सुविधाका कुरामा कमी महसुस भएकोले आगामी दिनमा यसलाई विस्तार गर्दै लाने बताए ।

कार्यक्रममा एमडी, एमडि÷एमएस, एमडिएस, एमएस्सी नर्सिङ, एम.पिए.एच, एमविविएस, विडिएस, विएस्सी नर्सिङ र विएस्सी आइटीका ५ सय ५६ विद्यार्थी दीक्षित भएका थिए । यसभन्दा अगाडि प्रतिष्ठानले २०७२ सालमा प्रधानमन्त्री एवम् उपकुलपतिको हैसियतले केपी शर्मा ओलीबाट विभिन्न फेकल्टीका पास आउट भएका विद्यार्थीहरुलाई दक्षित गरेका थिए ।्