शिक्षा सन्देश निजी क्षेत्रको पहिलो र नम्बर “वान”मा पर्छ

शिक्षा सन्देश इंग्लिस बोर्डिङ स्कुल साविक पाँचकन्याको पहिलो नीजि क्षेत्रको स्कुल हो ।

सरस्वती माध्यमिक विद्यालय तत्कालिन गाविसकै ऐतिहासिक र पुरानो बिद्यालय हो । सरकारी स्तरको पहिलो र ऐतिहासिक विद्यालय सरस्वती हो भने निजी क्षेत्रबाट सञ्चालित शिक्षा सन्देश पनि एतिहासिक र पहिलो स्कुल नै हो ।

 

यो स्कुल वि.सं. २०४८ सालदेखि सुरुवात भएको हो । धरान ६ पानबारीमा स्थापित शिक्षा सन्देशले स्थापनाकालदेखि नै अंगे्रजी माध्यमको शिक्षा प्रदान गर्दै आएको छ  ।

शिक्षा सन्देशले स्थापनाकालदेखि नै अभिभावक र बिद्यार्थीको अंग्रेजी माध्यमबाट पढाउने र पढ्ने सपनालाई स्थापनाकालदेखि नै पुरा गर्दै आएको छ । हजारौं बिद्यार्थीले उक्त स्कुलबाट माध्यमिक लेवलको पढाई पुरा गरी उच्च शिक्षा अध्ययन गरी आत्मनिर्भर भइसकेका छन् ।

नर्सरीदेखि कक्षा १० सम्म पढाई हुँदै गत बर्षदेखि भने त्यहीँ नै कक्षा ११ र १२ को पनि अध्ययन गराउने भरपर्दो,गुणस्तरीय शिक्षा र उत्कृष्ट नतिजा हासिल गर्ने शिक्षा सन्देश स्कुल बन्न सफल भएको छ ।

अंग्रेजी माध्यमको पढाई र उच्च शिक्षा हासिल गर्न धरान बजार लगायत अन्यत्रै शहर जानुपर्ने बाध्यतात्मक परिस्थितीलाई सहज बनाएपछि बिद्यार्थी र अभिभावक पनि दंग छन् । आफ्नै घर अगाडी र आफ्नै गाउँमा सुविधा सम्पन्न स्कुलमा पढ्न पाउँदा उनीहरु खुशी भएका हुन् ।

यसै सन्दर्भमा शिक्षा सन्देश इंग्लिस बोर्डिङ स्कुल धरान ६ का स्कुल सञ्चालक समितीका अध्यक्ष चन्द्र बहादुर सुवेदीसँग कोशीपत्र दैनिकले गरेको कुराकानी यहाँ प्रस्तुत गरिएको छ ।

– यो स्कुलको स्थापना कहिले र कसरी भएको हो ?

यो स्कुल वि.सं २०४८ सालमा स्थापना भएको हो । स्कुल स्थापना गर्दा देखि नै यसको महत्व र आवस्यकता बढ्दै गयो । वि.सं २०५४ सालदेखि यहाँकै स्थानीय शिक्षासेवीहरुद्धारा यसको सञ्चालनको जिम्मेवारी लिएर अहिले सम्म आइरहेका छौं ।

तत्कालिन अवस्थामा ग्रामीण भेगको दुरदशा र अभिभावकको आर्थिक अवस्था कमजोर रहेको थियो । दुई वटा खोलालाई पार गरेर धरान सम्म पुग्नु पर्ने बाध्यता रहेको थियो ।

त्यतिखेरको अवस्थादेखि शिक्षा क्षेत्रको लागि हामी स्थानीय ९ जना मिलेर यसको व्यवस्थापन गरेका हौं । त्यो अवस्थामा सामुदायिक विद्यालय एउटा मात्रै,उक्त विद्यालयमा विद्यार्थीको चाप एकदमै बढेकोले त्यसको न्युनिकरणको लागि यहाँका नानीबाबुहरुलाई उच्च शिक्षा पढ्नेको लागि सहज बनाउँदै आएका छौ ।

गुणस्तरीय शिक्षा प्रदान गर्ने,सस्तो र सुलभ माध्यमबाट पढाई हुने र ग्रामीण भेगमा रहेर पनि अंगे्रजी माध्यमको पढाई हुने उत्कृष्ट स्कुलको रुपमा रहेको छ । अन्तराष्ट्रिय अंग्रेजी भाषाको लागि गाउँमा यो स्कुलले महत्वपुर्ण योगदान पुर्याउँदै आएको छ ।

यहाँ पढेका विद्यार्थीहरु देशका उच्च ओहोदामा पुगेका छन् । इन्जियिर, मेडिकल ,सरकारी स्तर अन्य सामाजिक संघ संस्था लगायतका क्षेत्रमा गर्बिलो पदमा रहेका छन् । अन्तराष्ट्रिय क्षेत्रको क्यानडा,जापान लगायतमा पनि उत्तिकै राम्रोसँग आफ्नो भाग्यको सुनिश्चिता गर्दै अब्बल भएर अघि बढ्दै हुनु हुन्छ । यसरी हामी स्थानीय स्तरमा राम्रो गुणस्तरीय शिक्षा दिने स्कुल बनाएर अघि बढेका छौ ।

गतसालदेखि यहाँको आवस्यकतालाई महसुस र मागलाई पुरा गर्नको निम्ति कक्षा ११ को पढाई पनि शुरु गरेका छौं ।

यसपाली कक्षा १२का बिद्यार्थी भाई बहिनीहरुले परीक्षा दिएका छन् र अव परीक्षाको नतिजाको पखाईमा रहेका छन् ।

हामीले कक्षा ११ मा म्यानेजमेन्ट,कम्युटर साइन्स फ्याकल्टीमा अध्यापन गराउन सुरु गरेका हौ । सवै अभिभावक र विद्यार्थी,शिक्षक शिक्षिका एवम् सम्पुर्णको सफलता पनि हो ।

–अब अहिले स्कुलको अवस्था के छ ?

अहिलेको अवस्थामा राम्रो छ । हामी दाबीकासाथ भन्छौ कि धरानभरीका स्कुलहरुमा हामी नम्बर वानमा पर्छौ । नढाँटी भन्नुपर्दा हामी धरानका नाम चलेका स्कुलहरुसँग तुलनात्मक रुपमा उत्कृष्ट छौ । किन की हाम्रा विद्यार्थीहरु राम्रो अंक ल्याएर उतीर्ण भएका छन् ।

यो वर्षको एसइई परीक्षाको रिजल्टले पनि देखाउँछ । विगतका बर्ष पनि त्यस्तै उत्कृष्ट नतिजा ल्याएर विद्यार्थी उतीर्ण हुदै आएका छन् ।

–स्कुलको पुर्वाधारहरु कस्तो छ ?

अवस्य पनि हामी सुविधा सम्पन्न भवन सहित सुविधायक्त पठनपाठन गराउन सक्षम छौ ।

हामीकहाँ यथेष्ठ जग्गा सहित खेल मैदान अनि आकर्षक कक्षा कोठाहरु रहेका छन् । विस्तारै यसलाई अझै डेभ्लोप गर्दै लैजाने छौ । हामी पुर्वाधारयुक्त र गुणस्तरीय शिक्षा प्रदान गर्नको लागि अब्बल रहेका छौ । दुई मत छैन ।

–कसरी अब्बल त ? के आधारमा अब्बल भएको दाबी गर्नु हुन्छ ?

हामी गुणस्तरीय शिक्षा प्रदान गर्नको लागि कुनै कसुर बाँकी राख्दैनौं । क्वालिटीमा प्रदान गर्नको लागि ढृढताको साथ लागि परेका छौं ।

हामीसँग क्वालिफाइड टिचरको व्यवस्था छ । विद्यार्थीको रुचीसँगै अतिरिक्त क्रियाक्लापमा पनि विशेष ध्यान दिन्छौं ।

यहाँ अरु पनि स्कुलहरु छन् । जुन तहगत रुपमा क्रमसः विकास हुदै गएका छन् । ५,६ वटा स्कुल छन्  ।

यो वडामा नै निजी क्षेत्रको स्कुल पछिल्लो समय भइरहँदा हामी नै अग्र स्थानमा रहेका छौं ।अरु स्कुललाई हामी प्रतिष्पर्धीको रुपमा हेर्दैनौ ,सहयोगीको रुपमा नै लिएका छौ ।

–अन्य स्कुलको भन्दा फरक विशेषता चाहिँ के छ ?

हामी नितान्त फरक नै छौं । किन की हामी विद्यार्थीलाई गुणस्तरीय शिक्षा त दिन्छौ नै । त्यसको अलवा हामी व्यवहारिक शिक्षामा पनि जोड दिने गरेका छौ । दक्ष शिक्षक र अहिलेको प्रविधी मैत्री शिक्षामा जोड दिएर अघि वढिरहेका छौ ।

त्यसैगरि महिनाको अन्तिम शुक्रबार कल्चरल पोशाकमा विद्यार्थी आउँछन् ।

विभिन्न जातजातीको सस्कृतिको जगेर्ना र संरक्षण अनि जानकारी दिनु स्कुलको कर्तव्य पनि हो ।

फलस्वरुपमा हामीले सोही अनुरुप शुक्रबार पढाउँदैनौ तर विविध कार्यक्रममा विद्यार्थी सहभागि भएर अभ्यास सहितको कार्यक्रममा सहभागि हुने गरेका छन् । हामीकहाँ छुट्टै डान्स कक्षा र त्यसका लागि डान्स डाइरेक्टर नियुक्ति गरेका छौ ।

जस्ले गर्दा विभिन्न जातजातीको कल्चरल डान्समा सिक्ने मौका पाउँछन् ।

घरायासी कामहरु कसरी गर्ने भनेर अभ्यास र साही अनुसार सिकाउँछौ  । जस्तो फाटेको लुगा सिलाउने सीप, दुना टपरी बनाउने लगायत जुन मानव जीवनको आवस्यकता भित्र पर्दछ ,त्यस्ता कुरा पनि सिकाउँछौ र ज्ञान दिन्छौ ।

–आगामी योजना के छन् ?

हामी मुलतः शिक्षासँगै भौतिक पुर्वाधारलाई बढी विकास गर्न तर्फ जोड दिन्छौ ।

आगामी दिनमा साइन्स ल्याब,म्युजिक ल्याब सहित सुविधा सम्पन्न भवन सहित सस्तो र सहुलियत रुपमा विद्यार्थीलाई गुणस्तरीय शिक्षा प्रदान गर्ने लक्ष्य लिएका छौं ।