सुनाखरी एकेडमीले विद्यार्थीलाई सम्मान गर्यो

धरान/  धरान– वडा नम्बर १२ स्थित चतरालाइनमा रहेको सुनाखरी एकेडमीले उत्कृष्ट भएका विद्यार्थीहरुलाई सम्ममान गरेको छ ।

विविध विधामा विजयी उत्कृष्ट विद्यार्थीलाई सम्मान गरेको हो । धरानमा भएको बीपी मेमोरियल महिला राष्ट्रिय कराँते प्रतियोगितामा सुनाखरीकी छात्रा निमा डोल्मा तामाङले २ स्वर्ण, १ रजत पदक र उत्कृष्ट फाइटरको उपाधिसहित नगद ८ हजार रुपैयाँ प्राप्त गरेकी थिइन् ।

त्यस्तै, गत ज्येष्ठ ३० र ३१ गते पोखरामा भएको १५ वर्ष मुनिका राष्ट्रिय टेबलटेनिस प्रतियोगितामा सुलेखा ठाकुरले १ रजत र १ कास्य पदक हासिल गरेकी थिइन् ।

यसैगरी सुनाखरीकै अर्का छात्र अनिष राईले फक्ताङ्लुङ मिडिया हाउस प्रा.लि. ले धरानमा आयोजना गरेको एसईई आइडल–२०२४ को गायनतर्फ फष्ट रनर अपको उपाधिसहित ३० हजार रुपैयाँ नगद, ट्रफी र प्रमाणपत्र प्राप्त गरेका थिए ।

यसैगरी गरिमा डान्स सेन्टर धरानले गत शनिबार आयोजना गरेको चिल्ड्रेन ट्यालेन्ट हन्टमा सुनाखरीकी छात्रा आयुषा राईले मस्ट चार्मिङ फेसको सब टाइटलसहित तेश्रो बनेकी थिइन् । आयुषाले १५ हजार नगद पुरस्कार प्राप्त गरेकी थिइन् ।

सुनाखरीकै तनुजा लिम्बूले मस्ट फ्रेन्डसीप, एबिका लिम्बूले मस्ट डिसिप्लिन र सोफिया राईले मस्ट एक्टिभको उपाधि हासिल गरेकी थिइन् ।

विभिन्न उपाधि हासिल गरेका विद्यार्थीहरुलाई स्कुलका प्रिन्सिपल मिलनकुमार राई, निर्देशक प्रदीप राई र प्लस टु कोअर्डिनेटर टपकुमार राईले अविर र खदा लगाएर सम्मान गरेका थिए ।

यसै अवसरमा स्कुलले कराते प्रशिक्षक किरण लामा र टेबलटेनिसकी प्रशिक्षक गीता थापालाई समेत सम्मान गरेको छ । विद्यार्थीहरुको मनोबल बढाउँदै हौसला प्रदान गर्न सम्मान गरिएको प्रिन्सिपल राईले बताए ।