धरानमा मदिराजन्य वस्तुको होर्डिङ बोर्डहरू हटाइने

धरान/ धरानका विभिन्न सार्वजनिक स्थलहरूमा राखिएका मदिराजन्य वस्तुको होर्डिङ बोर्डहरू हटाइने भएको छ ।

स्वास्थ्य शिक्षा सूचना, सञ्चार केन्द्रद्वारा धरान उपमहानगरपालिका तथा सरोकारवालाहरूको सहभागितामा आइतवार भएको ’मदिरा नियन्त्रण तथा नियमन’ सम्बन्धी कार्यशालामा मदिराका प्रचार प्रसार गरिएको होर्डिङ बोर्ड हटाउने सहमति भएपछि त्यस्ता सामाग्रीहरु हटाइने भएको हो ।

विद्यालयका २ सय गजभित्र मदिराजन्य पदार्थ बिक्री गर्न बन्द गराउने पनि सहमति भएको छ ।

अनुमति नलिई मदिरा बिक्री वितरण गर्न नपाइने सहमति भएको बजार अनुगमन अधिकृत वेदप्रसाद सापकोटाले बताएका छन् ।

गोष्ठीमा सुनसरीका प्रमुख जिल्ला अधिकारी जयनारायण आचार्यले शैक्षिक संस्थाको सटरमा नै मदिरा बिक्री हुने गरेको बताए ।

धरान उपमहानगरपालिका उपमेयर अइन्द्रविक्रम बेघाले मदिरा पसल नियमनका लागि नियम कानुन बनाउन पहल गर्ने प्रतिबद्धता जनाउँदै भने ‘मदिरा व्यवसायीसँग छलफल गरेर मदिरा नियमन सम्बन्धी नीति बनाउन पहल गरिने छ ।’

राष्ट्रिय स्वास्थ्य शिक्षा सूचना केन्द्र प्रमुख केशव राज पण्डितको सभापतित्वमा भएको गोष्ठीमा वरिष्ठ स्वास्थ्य शिक्षा प्रशासक डा. भक्तबहादुर केसीले कार्यपत्र प्रस्तुत गरे ।

गोष्ठीमा सुरक्षा निकायका प्रमुख, मदिरा व्यवसायीहरू, सामाजिक सङ्घ, संस्थाका पदाधिकारीहरू सहभागीता रहेको थियो ।