पानबारी गोल्डकपः पहिलो खेलबाटै बाहिरियो आयोजक

धरान/ धरानको पानबारीमा भइरहेको पानबारी गोल्डकपमा नेपाल पुलिस विराटनगरसँग सडनडेथमा पराजित हुँदै आयोजक पानबारी फुटबल क्लब गोल्डकपबाट बाहिरिएको छ ।

 निर्धारित समयको खेल गोलरहित बराबरी भएपछि खेल टाइब्रेकरमा पुगेको थियो ।

टाइब्रेकरमा समेत ५–५ गोलको बराबरी भएपछि खेलको निर्णय सडनडेथबाट लिइएको थियो ।  

सडनडेथमा पानबारीका सुबास मगरको प्रहार पुलिसका गोल किपर बाल्मिकी राईले बचाएपछि पानबारी पराजित भएको हो ।

विजयी भएको टोली पुलिस सेमिफाइनलमा प्रवेश गरेको छ ।

टाइब्रेकरमा पुलिसकालागी रमेश राजवंशी, अजय परियार, अभिषेख आलेमगर, सुमित प्रधान, दिलबहादुर तामाङ, समिर लिम्बू र सन्दिप भुजेलले गोल गरे ।

पानबारीका अजय बिष्ट, विजय भुजेल, मिन धिमाल, गोविन्द कार्की, पुर्ण चोङबाङ र तिर्थ बस्नेतले गोल गरे ।

खेलको म्यान अफ द म्याच पुलिसका गोल किपर बाल्मिकी राई घोषित भए । उनलाई नगद २ हजार १ सय पुरस्कार दिइएको थियो । 

 भोली एपिएफ पकली र आइआरएफसी काठमाडौबीच खेल हुने आयोजकले जानकारी दिएको छ ।

प्रतियोगिताको विजेता टिमले नगद १ लाख ११ हजार १ सय ११ प्राप्त गर्नेछ भने उपविजेताले ५५ हजार ५ सय ५५ रुपैया प्राप्त गर्नेछ ।

पानबारी फुटबल क्लबको आयोजनामा भइरहेको पानबारी गोल्डकप २९ बैशाखसम्म सञ्चालन हुने आयोजक क्लवका अध्यक्ष भुपाल(कृष्ण कुमार) राईले वताए ।