_1693980289.gif "#")
ताप्लेजुङ । हिउँद भरिको खडेरीले आजित भएका किसानलाई वर्षा भएपछि थोरै भएपनि राहत मिलेको छ ।
ताप्लेजुङसहित पूर्वी पहाड तथा हिमाली जिल्लमा मङ्गलबार रातिदेखि वर्षा हुन थालेछि किसानलाई राहत महसुस भएको हो ।
मकै बाली लगाउने समयमा वर्षा नभएपछि किसान चिन्तित थिए ।
लामो खडेरीका कारण समयमा मकै बाली लगाउन नपाएका किसानलाई वर्षा हुन थालेपछि राहत महसुस गरेका छन् ।
हिउँदभर वर्षा नहुँदा अधिकांश किसानले मकै बाली लगाउन पाएका थिएनन् भने मकै रोपेको (छरेको) राम्ररी नउम्रेको र उम्रेको पनि सुक्न थालेको थियो ।
मङ्गलबारदेखि भने सामान्य वर्षा हुन थालेपछि मकै खेती लगायत हिउँदे बालीका लागि राहत मिलेको फुङ्लिङ नगरपालिका–५ का स्थानीय विक्रम लिम्बूले बताए ।
लिम्बूका अनुसार सामान्य भएपनि वर्षा भएकाले हिउँदे बालीलाई राहत पुगेको छ । पानीको पर्खाइमा मकै बाली लगाउन नपाई बसेका किसानलाई ठुलो राहत मिलेको उनले बताए ।
जिल्लाको पूर्वी सिदिङ्वा गाउँपालिका ४ साब्लाखुका किसान दलबहादुर लिम्बूले माटो नभिजे पनि वर्षाले राहत मिलेको बताए ।
धान खेती लगाउने खेत (जग्गा) मा मकै लगाउनलाई ढिलो भइसके पनि सामान्य वर्षा भएसँगै बुधबार देखि नै रोप्न थालेको लिम्बूले बताए । उनका अनुसार गाउँका अन्य किसानले पनि मकै खेती लगाउन सुरु गरेका छन् ।
मकै खेती लगाउने मुख्य समय माघ र फागुन महिना भए पनि वर्षा नभएकाले अहिलेसम्म खेती लगाउन पाएका थिएनन् ।
पानीको पर्खाइमा रहेका अधिकांश किसानले सामान्य वर्षा हुने बित्तिकै धमाधम मकै खेती लगाउन थालेका छन् । मकै खेती लगाउनलाई केही ढिलो भएपनि अहिले लगाएको बालीका लागि थप समय अनुकूल भई दिएमा उत्पादनमा खासै कमी नआउने किसानको भनाइ छ ।
यस्तै, अहिले भएको वर्षाले नगदेबाली अलैँची, फलफूल खेती लगायतका हिउँदे बालीलाई थोरै भए पनि राहत पुगेको किसानले बताएका छन् । लामो अवधिको खडेरीपछि सामान्य वर्षा हुँदा कृषि कर्मका लागि पर्याप्त भने नहुने किसानहरू बताउँछन् ।
कृषिका लागि समय अनुकूल हुनलाई बेला बेलामा वर्षा हुन अनिवार्य रहेको उनीहरूको भनाइ छ ।
यता लामो सुख्खा मौसमका कारण वनमा डढेलो लाग्ने क्रम बढिरहेका बेला वर्षाले राहत मिलेको सामुदायिक वन उपभोक्ता महासंघ नेपाल ताप्लेजुङका अध्यक्ष सुरज ओझाले बताए । वर्षाले डढेलो नियन्त्रणमा सहयोग पुगेको र थोरै भए पनि वातावरण सन्तुलित बनाउनुमा टेवा पुग्ने ओझाको भनाइ छ ।
बितेको २४ घण्टामा ताप्लेजुङमा २.५ मिलिमिटर वर्षा भएको जल तथा मौसम विज्ञान फिल्ड कार्यालयले जानकारी दिएको छ ।
