धरान / धरानका सामाजिक व्यक्तित्व तथा धरान सरोकार समाज काठमाडौंका अध्यक्ष प्रभुप्रसाद श्रेष्ठको निधन भएको छ ।
काठमाडौंमा रहेका धरानेहरु जुटाएर धरानको विकास निर्माणमा हातेमालो गर्ने उद्देश्यले स्थापित धरान सरोकार समाजका अध्यक्ष रहेका श्रेष्ठले धरानको विकास निर्माणका लागि राजधानीमा बसेर उल्लेख्य काम गरेका थिए ।
उनले धरानको विकास, निर्माणमा सहयोग पुरयाउन धरान सरोकार समाज गठन गरेका थिए ।
मृगौला रोगबाट पीडित उनको सोमबार दिउँसो निधन भएको छ ।
धरान–२ पुरानो बजारस्थित आफ्नै निवासमा मृगौलाको डायलासिस गराइरहेका उनी घरमै लडेपछि उनको टाउकोमा चोट लागेको र धरानस्थित बीपी कोइराला स्वास्थ्य विज्ञान प्रतिष्ठानमा भर्ना भएका थिए ।
उनको उपचारका क्रममा निधन भएको हो ।
आर्थिक, भौतिक, सामाजिक हिसाबले उनी धरानको विकासका लागि काठमाडौंमा बसेरै भएपनि काम गरिरहेका थिए ।
धरानमा एडिबी खानेपानी योजना ल्याउन उनको मुख्य भूमिका रहेको थियो । यस्तै, धरानमा मालपोत कार्यालय ल्याउन पनि उनको ठूलो हात छ ।
यस्तै, धरानमा सिटी हस्पिटलको खोल्नका लागि उनले प्रक्रियाका लागि दौडधुप समेत गर्दै आएका थिए ।
अत्यन्तै मिलनसार, सबैलाई मिलाउन सक्ने क्षमता भएका उनी जहिल्यै धरान सोंचेर हिँडिरहेका भेटिन्थे ।
धरानका मेयर, सांसद वा ठूला नेतालाई भेटेर धरानको बारेमा चिन्ता व्यक्त गरिरहने उनको धरानको खेलकुदको विकासमा पनि योगदान रहँदै आएको छ ।
उनी यसअघि राष्ट्रिय खेलकुद परिषद्को सदस्य, टेबलटेनिसको राष्ट्रिय कोच, धरान जेसीज १९८१ मा अध्यक्ष समेत भइसकेका उनी धरानको विकासका लागि मरिमेट्ने गर्दथे ।