पहिचानवादीलाई प्रहरीद्वारा पक्राउ

सुनसरी/ कोशी प्रदेश नामाकरणको विरोधमा आन्दोलनरत पहिचानवादीले गरेको कोशी प्रदेश बन्दको चेतावानी दिएका नेताहरुलाई प्रहरीले पक्राउ गरेको छ ।

नेकपा एमालेको अभियान कोशी प्रदेश प्रवेश गरे सँगै पहिचानवादीले बन्दको घोषणा गरेका थिए । आन्दोलनको घोषणा गरेका उनीहरुलाई प्रहरीले पक्राउ गरे पछि रिहाइको माग गर्दै थप आन्दोलनको चेतावनी पनि दिएका छन् ।

आन्दोलनका क्रममा पक्राउ परेका पूर्वमन्त्री गोपाल किराँती लगायतका पहिचानवादी नेताहरूलाई तत्काल रिहा गर्न प्रदेश नम्बर १ पुनः नामकरण संयुक्त संघर्ष समितिले माग गरेको छ ।
बन्दका क्रममा पक्राउ परेका नेताहरूलाई रिहा नगरे समितिले अनिश्चितकालका लागि प्रदेश बन्द गर्ने चेतावनी दिएको छ ।

समितिले आन्दोलनका क्रममा पक्राउ गरिएका पूर्वमन्त्री किराँती, जसपा नेता राजेश राई, हलेसी तुवाचुङ युवा सहसंयोजक गन्धमान राई, विजय राई, उदिम राई, विदुर राई, मीना राई, जसपा प्रदेश सदस्य दिनेश राईलगायतलाई तत्काल रिहा माग गरेको छ ।

समितिले मंगलबार विज्ञप्ति निकाल्दै पहिचानको खिल्ली उडाउन केही अवाञ्छित तत्वहरूको यस क्षेत्रमा गतिविधि बढेपछि पहिचान रक्षाको लागि यस संयुक्त संघर्ष समितिले घुर्मीदेखि लेगुवा घाटसम्मको मध्यपहाडी लोकमार्ग बन्द आह्वान गरेको हो ।