विराटनगर/ धर्म सहितको सनातन हिन्दु राष्ट्रको माग राख्दै कोशी प्रदेशसभा सदस्य भीम पराजुलीले छठ पूजाका लागि सिंघिया घाटसम्म घस्रेर दण्ड प्रणाम यात्रा गरेका छन् ।
नेपाली काँग्रेसका केन्द्रीय सदस्यसमेत रहेका पराजुलीले हिन्दु राष्ट्र नभई देशको विकास र सुख शान्ति नहुने उनको तर्क रहेको छ ।
राजनीतिक प्राणी भएकाले बौद्धिक सनातनी धर्म चाहिने उनले बताए । उनले भने, ‘हिजोको मेरो एजेन्डा पनि हो, छैठि मातासँग मेरो अहिले पनि प्रार्थना छ, मुलुकको शान्ति विकास र समबृद्धिका लागि कामना गरेर दण्ड प्रणाम यात्रा गरेको हुँ, मेरो व्यक्तिगत केहि छन ।’
दण्ड प्रणाम यात्राका लागि उनी शनिवारदेखि व्रत बसेका थिए ।
व्रतका साथ यात्रा गर्न थालेको २९ वर्ष भएको उनले बताए । विराटनगर महानगरपालिका ३ ठुलो मिल चोकमा रहेको शिव पाञ्चायन मन्दिरमा पूजा गर्दै सिंघिया खोलामा राखिएको पूजा स्थलसम्म झन्डै साढे ३ किलोमिटर दण्ड प्रणाम गर्दै यात्रा गर्ने गरेको उनले बताए ।
पराजुलीसँगै उनका भतिज प्रमेशले पनि दण्ड प्रणाम यात्रा शुरू गरेका छन् ।