धरान/ अखाद्य वस्तु मिसाएर बनाएको बेसार धरान उपमहानगरपालिकाले नष्ट गरेको छ ।
धरान उपमहानगरपालिकाले अनुगमन गर्दा फेला परेको १७ सय ४८ केजी मिसावट गरिएको अखाद्य बेसार नष्ट गरिएको अनुगमन अधिकृत वेदप्रसाद सापकोटाले जानकारी दिए ।
धरान उपमहानगरपालिकाका मेयर हर्कराज राई, उपमेयर अइन्द्रविक्रम बेघा, प्रहरी, प्रशासन लगायतको उपस्थितिमा धरान–११ स्थित निर्माणाधीन माया धराने साबुन फ्याक्ट्रीको जग्गामा नष्ट गरिएको हो ।
गएको भदौ २ गते अनुगमनका क्रममा धरान ११ स्थित चण्डेश्वरी कुटानी पिसानी मिलले १ हजार ७ सय ४८ केजी बेसार मिसावट गरेको पाइएको सापकोटाले बताए ।
त्यहाँ बेसारमा चामलको खुदी मिसाएर पिसेको पाइएपछि सञ्चालकलाई दुई लाख रुपैयाँ जरिवाना पनि तिराइएको उनले जानकारी दिए ।
अनुगमन अधिकृत सापकोटाका अनुसार मिल सञ्चालक र व्यापारीले जरिवाना रकम राजश्वमा जम्मा गरेपछि मिसावट गरिएको बेसार नष्ट गरिएको हो ।
उनले उपभोक्ता हित संरक्षण ऐन २०७५ को दफा ३९ को १ (ख) बमोजिम २ लाख रुपैयाँ जरिवाना गरेको बताए ।
मिलबाट यसअघि नै ११ सय २५ केजी मिसावट बेसार बरामद भइसकेको थियो भने सिल गरेर राखिएको अन्य बेसारचाहिँ बिहीबार लगिएको र नष्ट गरिएको उनले जानकारी दिए ।
उनले खुदीलाई बेसार जस्तो देखाउन फुड कलर समेत मिसाइएको पाइएको जानकारी दिए ।