ठेकेदारलाई कारवाही गर

हामीकहाँ ‘असारे विकास’ को प्रवृत्ति अघोषित परम्परा नै बन्न पुगेको छ । आर्थिक वर्षको अन्तिम महिना असार हो । काम हुन नसकी बजेट फिर्ता हुने बेला भएपछि पैसा सक्न अन्तिम समयमा हतार–हतार गरिने विकास निर्माणलाई असारे विकास भन्ने गरिन्छ ।

यस्तो काम हतारमा गरिने भएकाले गुणस्तरीय हुँदैन । हाम्रो देशमा असारे विकास परम्पराकै रूपमा स्थापित भएको छ । यस्ता विकास टिकाउ पनि हुँदैनन् । देशको कुनै एक क्षेत्रमा मात्र होइन, यस्तो प्रवृत्ति हरेक क्षेत्रमा देखिन्छ । ठूल्ठूला पुल, भवन र सडक संरचनाहरू यस्तै असारे विकासको शिकार हुने गरेका छन् ।    

धरान–९ को सिद्धिविनायक पथ पनि असारे विकासको शिकार भएको समाचार आएको छ । यो सडक बजार क्षेत्रमै अत्यन्तै व्यस्त र सवारी साधनहरूको चाप अधिक हुने सडकमा पर्छ । सवारी साधन बढी कुद्ने यो सडक निर्माण भएको चार महिनामै भत्किन थालेको छ । गत वैशाख महिनामा कालोपत्रे गरिएको सडक भत्कन थालेपछि खाल्डाखुल्डी पर्न थालेका छन् ।

सडकका गिट्टी बाहिर निस्कन थालेको छ । खाल्डाखुल्डी, धूलो र गिट्टी निस्कन थालेपछि आवागमन असहज हुन थालेको समाचार प्रकाशमा आएको छ । सडकमा खाल्डाखुल्डी हुने र गिट्टी बाहिर निस्किने अवस्था भएपछि दुर्घटनाको जोखिम पनि बढेको छ । यसतर्पm स्थानीय सरकारको ध्यान जानुपर्छ ।

ठेकेदारले गुणस्तरीय निर्माण सामग्री प्रयोग नगरेका कारण सडक यति चाँडै जीर्ण भएको स्थानीयको भनाइ छ । यो गम्भीर विषय हो । यसलाई पुनःनिर्माण गर्नु आवश्यक छ । बेवास्ता गर्दा दुर्घटनाको जोखिम अझ बढ्ने भएकाले यसलाई समयमै मर्मत गर्नुपर्छ । वार्षिक बजेट फ्रिज हुने अवस्थामा हतारमा गरिएको कामले लगानी खेर गएको छ ।

आगामी दिनमा विकास निर्माणका काम गर्दा यसतर्फ सचेत हुनुपर्छ । सार्वजनिक कामलाई झारा टार्ने रूपमा लिने, गुणस्तरहीन सामग्री प्रयोग गर्ने प्रवृत्तिका कारण सार्वजनिक कामहरू कमसल हुने गरेका छन् । यसरी सार्वजनिक सडक र संरचनाहरू कमसल हुँदा राष्ट्रिय सम्पत्ति खेर जाने मात्र होइन, सर्वसाधारणको ज्यान पनि जोखिममा पर्ने गरेका छन् ।

सार्वजनिक काममा कमसल सामग्री प्रयोग गर्ने ठेकेदारहरूमाथि आवश्यक कारवाही हुनु आवश्यक छ । त्यस्ता जीर्ण संरचनाको पुनःनिर्माण पनि सम्बन्धित ठेकेदारले पुरानै लगानीमा गर्नुपर्ने व्यवस्था हुनुपर्छ । अनि मात्र यस्तो प्रवृत्तिको अन्त्य हुने आशा गर्न सकिन्छ । अन्यथा ठेकेदारहरू मोटाउने तर सार्वजनिक काम कमसल हुने प्रवृत्ति यथावत् रहनेछ ।