धरान । प्रदेश नम्बर १ स्तरीय वाइवाइ एसइई स्टेट–१ सिङ्गीङ आइडल सिजन–२ र डान्सिङ स्टार सिजन–१ को उपाधि क्रमश: धरान–१८ स्थित कार्मेल हाइस्कुलका छात्र छिरिङ तामाङ र सिदार्थ इङलिस बोर्डिङ स्कुल विराटचोककी नुमा लिम्बूले जितेका छन् ।
धरान–१५ चुम्लुङहिमको भवनमा शुक्रबार सम्पन्न प्रतियोगितामा गायनतर्फ तामाङ र नृत्युतर्फ लिम्बुले उपाधि जितेका हुन् ।
उपाधि उचाल्दै छिरिङ र नुमाले ५० हजार रुपैयाँ नगद र प्लस टु अध्ययनका लागि पूर्ण छात्रवृत्ति पाएका छन् । यसैगरी गायनतर्फ जेनिथ स्कुलका धरान १६ का रिजन लोहनी फस्ट रनरअप र होलिल्याण्ड इन्टरनेशनल स्कुल धरान १५ की गनु राई सेकेण्ड रनरअपको उपाधि जिते । उनीहरुले क्रमशः ३० हजार र १५ हजार रुपैयाँ नगद, प्लस टु पढ्न ५० प्रतिशत छात्रवृत्ति प्राप्त गरेका छन् ।
यसैगरी नृत्यतर्फ धरान–१० स्थित युएन स्कुलकी नियति राना मगर फस्ट रनरअप र धरान–१२ स्थित सुनाखरी एकेडेमीकी प्रकृति खापुङ सेकेण्ड रनरअप बनिन् । उनीहरुलाई पनि क्रमश ः ३० हजार र १५ हजार नगद, प्लस टु पढ्न ५० प्रतिशत छात्रवृत्ति प्राप्त गरेका छन् । प्रतियोगिताका निर्णायकमा गायनतर्फ भ्वाइस अफ नेपाल सिजन–२ का फाइनलिस्ट विकास लिम्बू र विनायक राई थिए भने नृत्यतर्फ छमछमी सिजन–३ कि फस्ट रनरअप मनिता राई र राष्ट्रिय डान्स कोरियोग्राफर पृतम साम्वाहाम्फे र लोक श्रेष्ठ रहेका थिए ।
उनीहरुलाई प्रमुख अतिथि प्रदेश १ का प्रमुख पर्शुराम खापुङ, आयोजक फक्ताङलुङ मिडिया हाउस प्रालिका अध्यक्ष डम्बरकुमार तुम्बापो, सल्लाहकार राम लिम्बू, सिजी फुडस नेपाल (वाइवाइ) प्रदेश १ का सहप्रबन्धक रविन्द्र मास्के, धरान प्रतिनिधि लिलानाथ ढुङ्गाना, होटल पिस पोखराका सञ्चालक मित्र तिवारी, युएन कलेजका होटल म्यानेजमेण्ट कोअर्डिनेटर गगनमान श्रेष्ठ, इभेन्ट म्यानेजर तिर्थ कार्कीलगायतले पुरस्कार तथा प्रमाणपत्र प्रदान गरेका थिए ।
प्रतियोगितामा गायिक मिलन अमात्य, गायक विकास तुम्बापो, शिक्षिका ज्योति सुनुवारलगायतले गीतमार्फत दर्शकलाई मनोरञ्जन प्रदान गरेका थिए ।