_1693980289.gif "#")
धरान । धरान–९, पुतलीलाइनको फ्रेन्ड्स गार्डेन रेस्टुरेन्टको शौचालयलाई निःशुल्करूपमा प्रयोग गर्ने गरी सार्वजनिक शौचालय घोषणा गरिएको छ ।
लायन्स क्लब अफ दन्तकाली र लिओ क्लब अफ दन्तकालीको संयुक्त पहलमा सो रेस्टुरेन्टसँग समन्वय गरेर शौचालयलाई सर्वसाधारणका लागि खुल्ला गरिएको लिओ क्लब अफ दन्तकालीका अध्यक्ष पोषणबाबु श्रेष्ठले जानकारी दिए । पर्यटक, आगन्तुक वा किनमेलमा निस्किएका सर्वसाधारणलाई शहरी क्षेत्रमा शौचालयको अभाव अट्किने गरेको छ ।
धरान नगर क्षेत्रमा पनि सार्वजनिक शौचालयको अभाव छ । यही आवश्यकतालाई महसुस गरेर फ्रेन्ड्स गार्डेनको शौचालयलाई सार्वजनिक गर्न आग्रह गरिएको अध्यक्ष श्रेष्ठले बताए । आप्mनो आग्रहलाई स्वीकार गरेकोमा उनले रेष्टुरेन्टका सञ्चालक सुमन श्रेष्ठ संगमलाई धन्यवाद पनि दिए । अध्यक्ष श्रेष्ठले अन्य रेस्टुरेन्ट, बैङ्क, व्यापारिक प्रतिष्ठानलगायतलाई पनि आफ्नो शौचालयलाई सार्वजनिक बनाउन आग्रह गरे ।
उपमहानगरले सञ्चालन गरिरहेको भानुचोकको सार्वजनिक शौचालय अव्यवस्थित र दुर्गन्धित भएको कारण रेस्टुरेन्टको शौचालयलाई सार्वजनिक बनाइएको रेस्टुरेन्टका सञ्चालक संगमको भनाइ छ । धरानमा सबैभन्दा बढी मानिसको आउजाउ हुने भानुचोक क्षेत्रमा व्यवस्थित शौचालयको आवश्यकता महसुस गरी धरानमै पहिलोपटक रेस्टुरेन्टको शौचालयलाई सार्वजनिक बनाइएको उनले बताए ।
