_1693980289.gif "#")
धरान । धरानमा भइरहेको हाम्रो धरान भेट्रान फुटबल प्रतियोगितामा झापाको दुधे भेट्रान र मोरङको लेटाङ भेट्रान सेमिफाइनलमा प्रवेश गरेका छन् ।
सोमबार भएको पहिलो खेलमा सुनसरीको दुहबी भेट्रानलाई २–० गोल अन्तरले पराजित गर्दै दुधे भेट्रान सेमिफाइनलमा प्रवेश गरेको हो । दुधेका लागी भिष्म सिटौला र लोकनाथ राईले गोल गरे । सिटौलाले खेलको ३८ औं मिनेटमा गोल गरेका हुन् भने राईले खेलको ६२ औं मिनेटमा गोल गरेका हुन् । दुधेले पहिलो खेलमा जनता भेट्रान इटहरीलाई पराजित गरेको थियो ।
त्यस्तै दोस्रो खेलमा झापाको विर्तामोड भेट्रानलाई पराजित गर्दै लेटाङ भेट्रान सेमिफाइनलमा प्रवेश गरेको छ । लेटाङले बिर्तामोडलाई ३–१ गोल अन्तरले पराजित गरेको थियो । खेलको ११ औं मिनेटमा बिर्तामोडका लिलाबहादुर जोशीले गोल गर्दै टोलीलाई अग्रता दिलाएका थिए । त्यसलाई जोगाउन नसक्दा हार बेहोर्न पुग्यो । लेटाङकालागी भुवनसिंह राईले दुई गोल गरे भने प्रकाश थापाले एक गोल गरेका थिए ।
मंगलबार हुने पहिलो खेलमा हाम्रो इटहरी भेट्रान र दमक लखनपुर भेट्रानले प्रतिष्पर्धा गर्नेछन् भने दोस्रो खेलमा हाम्रो धरान भेट्रान र एभरेष्ट भेट्रान मोरङ बीच प्रतिष्पर्धा हुने भएको छ । हाम्रो धरान भेट्रान फुटबल क्लबको आयोजनामा भइरहेको प्रतियोगितामा ४० वर्ष माथी उमेर समुहका खेलाडी सहभागी छन् भने ३८ वर्षका ३ जनालाई पनि समावेश गराउन पाउने नियम छ । प्रतियोगिताको विजेतालाई नगद ८० हजार र उपविजेतालाई नगद ४० हजार प्रदान गरिने आयोजकले जनाएको छ ।
