‘राजनिति दुर्गन्धित बन्यो’

धरान । राजनीतिलाई पेशा व्यवसाय बनाउँने लोभीपापीहरूका कारण राजनीति दुर्गन्धित भएको राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देनले आरोप लगाएका छन् ।

उनले कमल थापा प्रति लक्षित गर्दै लोभीपापीले पाटी फुटाएको आरोप समेत लगाए । बुधवार विराटनगरमा राप्रपा मोरङले आयोजना गरेको कार्यक्रममा बोल्दै अध्यक्ष लिङ्देनले राजनीति गर्नेहरूले ७ पुस्ता सपार्ने व्यापार ठानेका कारण देशको अवस्था बिग्रिएको बताएका छन । उनले भने, ‘राजनीति गर्नेहरूले ओढ्ने, ओछ्याउने बनाए, शौचालय बनाए, भान्सा पनि बनाए, ७ पुस्ता सपार्ने व्यवसाय पनि बनाए, त्यसको असर अहिले हामीले भोगिरहनुपरेको छ ।’

अध्यक्ष लिङ्देनले एमाले, कांग्रेस, माओवादी लगायत ठूला दलका इमान्दार कार्यकर्तालाई राति एैठन हुने गरेको समेत बताए । नेताहरूको हर्कत देख्दा इमान्दार कार्यकर्तालाई निद्रा नलाग्ने गरेको उनले बताए । राजनितिलाई व्यवसाय बनाउने नेताहरुकै कारण कार्यकर्ताहरुमा वितृष्णा जागेको बताए । उनले भने, ‘यसको परिणाम राजनीतिप्रति वितृष्णा बढ्दै जान थालेको छ, राजनिति गर्नेहरुले सोच्ने बेला आएको छ ।’

स्वीजरल्यान्डमा राजारानीको नाममा राखेको पैसा फिर्ता ल्याउँदा पनि प्रत्येक नागरिकलाई ४–५ विगाहा जमिन दिन सकिन्छ भनेर भाषण गर्ने नेताहरू सरकारमा हुँदा देशनै संकटमा परेको बताए । राजारानीका नाममा कुन बैंकमा कति पैसा राखिएको रहेछ भनेर खोजी गर्न समेत लिङ्देनले माग गरे । राजाले जनताको नासो जनतामा फर्काएको १५ वर्ष पुग्दा किन पैसाको खोजी नगरेको भन्दै उनले प्रश्न गरे । राजारानीका नाममा कुन बैंकमा कति पैसा राखिएको रहेछ भनेर खोजी गर्न समेत लिङ्देनले माग गरेका छन ।