_1693980289.gif "#")
तस्वीरहरुः फडीन्द्र तिम्सिना
धरान । सुनसरीको बराहक्षेत्रको पर्यटक तान्ने अर्को माध्यम चतरादेखि भोजपुरसम्म चल्ने पानी बोट नै हो । कोशीमा चल्ने बोटकै कारण पछिल्लो समय आन्तरिक तथा वाहय पर्यटक आउने गरेका छन् ।
बोटमा यात्रा गर्नेहरु प्राय ः जल पर्यटनमा शौखिन राख्नेहरु नै हुन्छन् । उनीहरु बोटमा चढेर कोशी नदीको यात्रा गर्दा ‘रिफ्रेसमेन्ट’कोमहसुस गर्छन् । भोजपुर जिल्ला लगायत अन्य जिल्लाका ग्रामीण क्षेत्रका सर्वसाधारणको लागि वोट सवारी साधनको माध्यम बनेपनि पर्यटकका लागि मनोरञ्जनको माध्यम बनेको छ ।
विराटनगरबाट बोटको मनोरञ्जन लिनकै लागि कोशी पुगेकी पुण्यमाया गौतमले कोशीमा बोट चढेर नौलो अनुभव बटुल्नकै लागि आएको बताइन् । उनले भनिन्–‘चतरामा बोट सञ्चालन छ भन्ने सुने पनि काम व्यस्थताका कारण बोट चढ्ने समय नै मिलेको थिएन, यसपटक बल्ल समय जु¥यो, रमाइलो भयो ।
शनिवार पविारसँगै कोशी पुगेकी पुण्यमायाले समय समयमा ‘रिफ्रेसमेन्ट’ कै लागि भएपनि आउनुपर्ने ठाउ रहेको बताइन् ।
झापाको दमकबाट बोट चढ्न उद्देश्य नै लिएर पुगेका जीवन गुरुङले समेत शनिवार बोटको मजा चाखे । यसअघि बोटमा नचढेका उनले पहिलो पटक बोटमा चढ्दा हल्का डरलागेजस्तो भए पनि भरपुर मजा लिएको बताए । उनले भने–‘शुरुमा त हल्का डर लाग्यो, जति जति तलतिर जादै गयो त्यति रमाइलो अनुभव हुदै गयो, डरसंगै संगै रमाइलो भयो ।
कोरोनाका कारण घरमै बसेका सर्वसाधारण कोरोना संक्रमण सकिएपछि भ्रमणलाई बढी प्राथमिकता दिन थालेका छन् । त्यसमा पनि पछिल्लो समय अत्याधिक गर्मीले बाहिर सम्म निस्कन नसकेकाहरुका लागि कोशीको बोट मनलोभ्याउने माध्यम बनेको छ ।
उनीहरुसँगै बोटको मज्जा लिन अहिले दैनिक ५० देखि ६० जना विभिन्न ठाउबाट आउने गरेको बोट सञ्चालकहरु बताउँछन् । बोट सञ्चालक दिनेश पौडेलका अनुसार गर्मी बढेसँग बोर्डमा चढेर मनोरञ्जन लिनेहरुको संख्या बढ्दै गएको बताए । उनले भने–‘विगतमा कोरोना कारण फाट्टफुट आउने भएपनि अहिले आउनेको संख्या बढ्दै गएको छ । यसले हामीलाई मात्र हैन पर्यटन सम्बन्धी काम गर्ने सबैलाई दह्रो आम्दानीको स्रोत बनेको छ ।’
उनका अनुसार बोट सञ्चालन हुदा यस क्षेत्रमको बराहक्षेत्र खण्डमा मात्र ८० भन्दा बढी टेम्पो, २० भन्दा बढी होटल व्यसायीको रोजीरोटी चलेको छ भने भोजपुर खण्डमा झण्डै ४० भन्दा बढी ल्याण्डरोवरको जीविकोपार्जन भएको छ ।
अर्का व्यवसायी विमल श्रेष्ठले कोरोना संक्रमण कम हुदै गएपछि पछिल्लो समय बोट चढ्नेको संख्यामा बृद्धि भएको बताउछन् । उनले नेपालबाट मात्र हैन भारतका केही स्थानबाट समेत बोटको मजा लिन आउने गरेको बताए । उनले भने–‘बोटले जल पर्यटकलाई तानेको छ, यसको फाइदा सबैले लिन सक्नुपर्छ ।’
बराहक्षेत्र नगरपालिकाले पनि बोट सञ्चालनले बराहक्षेत्रको जल पर्यटनको प्रवद्र्धनमा सहयोग पुग्ने अपेक्षा राखेको छ । बराहक्षेत्र नगरपालिकाकी उपमेयर कमला मगरले बराहक्षेत्र नगरपालिकामा धार्मिक क्षेत्रसँगै जल पर्यटनको सम्भना प्रचुरमात्रामा रहेको बताइन् । उनले भनिन्–‘धार्मिक पर्यटनको क्षेत्र त बराहक्षेत्र छँदैछ, त्यसमा जल पर्यटनको पनि सम्भावना बढी छ, यसको विकासमा योजना अगाडि बढाउनुपर्छ ।’
जल पर्यटनको माध्यमबाट कोशीलाई अन्य पर्यटनसंग जोड्न सके बराहको विकासले फड्को मार्ने उनको भनाई छ । कोशीमा एक दर्जन जति बोटहरु सञ्चालनमा रहेका छन् ।
