सियोनले अन्तर विद्यालय बास्केटबल प्रतियोगिता गर्ने

धरान । धरान १६ स्थित सियोन स्कूलले अन्तर विद्यालय बास्केटबल प्रतियोगिताको आयोजना गर्ने भएको छ ।

स्कूलले आइतबार धरानमा पत्रकार सम्मेलनको आयोजना गरी फागुन २४ गतेदेखि ‘सियोन थ्रि वाइ र्थी अन्तर विद्यालय, महिला, पुरुष बास्केट बल प्रतियोगिता’ को आयोजना गर्न लागेको जानकारी दिएको हो । सियोन स्कुलका प्रिन्सिपल सञ्जिव वान्तावाका अनुसार माध्यमिक तह ( +२ मा) अध्ययनरत १५ बर्ष मुनिका बालबालिकालाई लक्षित गरी प्रतियोगिता आयोजना गर्ने भएको हो ।

प्रतियोगितामा धरानका नीजि तथा संस्थागत विद्यालयका महिला तथा पुरुष गरी २३ टिमको सहभागिता रहने प्रिन्सिपल वान्तवाले जानकारी दिए । उनले भने, ‘प्रतियोगिताका लागि हालसम्म आयोजक सियोन, होलिल्याण्ड, समिट, प्रहरी स्कूल, युएन, डिपो, सगरमाथाले भिड्न्े भएपनि धरानका अन्य विद्यालय र तरहराका विद्यालयहरु आउने सम्भावना बढेर गएको छ, महिला ८ टिम र पुरुष १५ टिम रहनेछन ।’

प्रतियोगिताका विजेता, उपविजेताको नगद रकम एकिन नभएपनि नगदसंंगै ट्रफी र मेडल पाउने प्रिन्सिपल वान्ताले जानकारी दिए । प्रतियोगितामा व्यक्तिगत विद्यातर्फ उत्कृष्ट खेलाडी र उदयीमान खेलाडीलाइ समेत ट्रफी र प्रमात्रपत्र प्रदान गरिने भएको छ । फाइनल खेलको दिन थ्री पोइन्ट कम्पिटिसन समेत गराइने र यसबाट नगद एक हजारसहित ट्रफी र प्रमाणपत्र प्रदान गरिने उनले जानकारी दिए ।

लामो समय भएको कोरोना कहरका कारण विद्यालयमा अतिरिक्त कार्यक्रम गर्न नसक्दा विद्यार्थीहरुको क्षमता अभिवृद्धि हुन नसकेको महसुस गरी क्षमता अभिवृद्धिकै लागि बास्केट बल प्रतियोगिताको आयोजना गर्न लागिएको उनले बताए ।