_1693980289.gif "#")
धरान । धरान उपमहानगरपालिकाले खेलाडी उत्पादनमा जोड दिदै आएको छ । ग्रास रुटबाट नै खेलाडी उत्पादन गर्ने अभिप्रायले बालबालिकालाई फुटखेलको प्रशिक्षण शनिवारबाट शुरु गरेको छ ।
गत बर्षबाट नै शुरु गरेको यो अभियानमा यो बर्ष समेत शनिवारबाट प्रशिक्षण शुरु गरिएको हो ।
कोरोना संक्रमणका कारण समयमै हुन नसकेको प्रशिक्षण असारसम्म गरिने जनाइएको छ ।
खेलकुद विकास समिति सदस्य तथा प्रशिक्षण कार्यक्रम संयोजक सतिस केसीले जानकारी दिए । उनका अनुसार गत जेष्ठ महिनामै आयोजना गर्नुपर्ने कार्यक्रम फागुनबाट मात्र शुरु गरिएको बताए । उनले भने–‘कोरोना संक्रमणका कारण जेष्ठ हुनुपर्ने कार्यक्रम फागुनमा सरेको हो, अबदेखि प्रत्येक बर्ष असारमै हुन्छ ।’
धरान १६ रंगशालामा आयोजित प्रशिक्षणमा ६ बर्षदेखि १२ बर्षका बालबालिका सहभागी थिए । अभिभावकसंगै आएका उनीहरु फुटबल प्रशिक्षणमा उत्साहित देखिन्थे ।
धरान उपमहानगरपालिकाको खेलकुद विकास समितिले ग्रासरुट फुटबल प्रशिक्षण शुरु गरेको हो । हरेक शनिबार बिहान ७ बजेदेखि हुने प्रशिक्षणमा पहिलो शनिवार नै उल्लेख्य उपस्थिति रहेको थियो ।
ग्रासरुटबाट नै फुटबल खेलको प्रशिक्षणसंगै राष्ट्रिय खेलाडी उत्पादन गर्ने उद्देश्यले प्रशिक्षण शुरु गरिएको धरान उपमहानगरपालिकाका प्रमुख तिलक राईले बताए । उनले भने –‘धरानलाई मिनी ब्राजिलको रुपमा लिइने गरिन्छ, यहाबाट धेरै राष्ट्रिय खेलाडी उत्पादन भएका छन्, फुटबल खेलमा स्थानीय स्तरबाट नै राम्रो खेलाडी उत्पादन गर्ने हाम्रो उद्देश्य हो ।’
कोरोना तथा विविध कार्यले फुटबल खेलको प्रशिक्षण तथा खेलहरु हुन नसकेको मेयर राईले बताए । उनले भने–‘यस्ता खालका प्रशिक्षणले राम्रा खेलाडी उत्पादन गर्न सहयोग पुग्छ भनेर हामीले ग्रास रुटदेखि नै प्रशिक्षण राखेका हौ, खेलकुदको विकासले नगरको पनि विकास हुन्छ, हामी यस्ता प्रशिक्षण निरन्तर गर्दैजान्छौ ।
