धरान । चिकित्सा शिक्षा आयोगले तोकेको भन्दा बढी शुल्क माग गरेको भन्दै आन्दोलनरत विद्यार्थीहरुले विराटनगर स्थित नोबेल मेडिकल कलेजमा तालाबन्दी गरेका छन् ।
आयोगले तोकेको शुल्क भन्दा बढी रुपैया मागेको भन्दै अनेरास्ववियु मोरङको नेतृत्वमा एमबीबीएस अध्ययनरत विद्यार्थी तथा अन्य विद्यार्थी संगठनहरुले मंगलबार कलेजमा तालाबन्दी गरेका हुन् । विगत केही दिन देखी निरन्तर आन्दोलनमा रहेका विद्यार्थीहरुले मंगलबार कलेजका प्रिन्सीपल रामहरी घिमिरेलाई अल्टीमेटम सहितको ज्ञापन पत्र बुझाएका थिए ।
विद्यार्थी नेता तुलसी घिमिरेले भने, ‘हिजो हामीले अल्टिमेटम सहीतको ज्ञापन पत्र कलेजलाई बुझाएको थियौ वार्ताको लागी अहिले सम्म पहल नभए पछि बाध्य भएर हामीले ताला लगाएका हौं ।’ विद्यार्थीको माग पुरा गर्न यथाशिघ्र वार्ताको पहल नगरे सम्म चरणवद्ध आन्दोलनका कार्यक्रमहरु घोषणा गर्ने विद्यार्थी नेता विरेन्द्र घिमिरेले बताए ।
तालाबन्दीको क्रममा भएको झडपमा परी केही विद्यार्थीहरु सामान्य घाइते समेत भएका छन् । विद्यार्थीहरुबाट गैरकानुनी रुपमा अतिरिक्त शुल्क असुल्न खोजेपछि विद्यार्थी र अभिभावकहरुले एक साता यता नोबेल प्रशासनको ध्यानाकर्षण गराउँदै स्थानीय प्रशासनमा समेत ज्ञापन पत्र बुझाएका थिए ।
अतिरिक्त शुल्क नतिर्ने विद्यार्थीहरुलाई सुरक्षागार्ड लगाएर कक्षा कोठा पुग्नबाटै रोक्दै आएको थियो ।
विद्यार्थी नेता नवीन पहाडीले आयोगले तोकेको भन्दा बढी शुल्क नलिन र लिएको रकम चाडै फिर्ता गरेर विद्यार्थीहरुलाई अध्ययनका लागी सहज वतावरण सिर्जना नगरे थप आन्दोलन गर्ने चेतावनी समेत दिएका छन् ।