_1693980289.gif "#")
धरान/ चिकित्सा शिक्षा आयोगले तोकेको भन्दा अतिरिक्त शुल्क माग गरेको भन्दै नोबेल मेडिकल कलेजमा चरणबद्ध आन्दोलनमा रहेका एमबीबीएस विद्यार्थीहरुलाई एमाले निकट अनेरास्ववियु मोरङले समर्थन जनाएको छ ।
नोबेलले अतिरिक्त शुल्क नबुझाउने एमबीबीएसमा भर्ना भएका नयाँ विद्यार्थीलाई प्रवेशमा रोक लगाएको विरोधमा अस्पताल परिसरमा विद्यार्थीहरुले आन्दोलन गरेका हुन् । अनेरास्ववियुले समर्थन जनाउँदै आन्दोलनमा सहित नेताहरू सहभागी भएका छन् ।
मंगलबार अनेरास्ववियू र एमबीबीएस अध्ययनरत विधार्थीहरुले संयुक्त आन्दोलन गर्दै मानव साङ्लो बनाएर अस्पताल परीषर घेरावन्दी गरेका थिए । त्यस्तै कागजको नमूना पैसा बनाएर अस्पताल प्रशासनलाई बुझाएका थिए भने कलेज पैसामुखी भएको भन्दै कलम डाउन समेत गरेका थिए ।
विद्यार्थीहरुले कलेजका प्रिन्सीपल रामहरी घिमीरेलाई २४ घण्टाको अल्टिमेटम सहितको ज्ञापनपत्र समेत बुझाएका छन् । २४ घण्टा भित्र कलेज प्रशासनले समस्या समाधानका लागी पहल नगरे कलेज प्रशासनमा तालाबन्दी गरिने अनेरास्ववियुका नेता विरेन्द्र घिमिरेले बताए । विरोध कार्यक्रमलाई मोरङका विद्यार्थी नेताहरु विरेन्द्र घिमिरे, नवीन पहाडी, तुलसी घिमिरे लगायतले सम्बोधन गरेका थिए । उनीहरूले सरकारले निर्धारण गरेको भन्दा बढी शुल्क माग गर्ने मेडिकल कलेजहरु यथासिघ्र कार्वाहीको दायरामा ल्याउन समेत माग गरेका थिए ।
अतिरिक्त शुल्क नबुझाएकै कारण कक्षामा प्रवेश नपाएका विद्यार्थीहरुले सोमबार १÷१ रुपैयाँ चन्दा समेत संकलन गरेर नोबेल मेडिकल कलेजलाई बुझाएका थिए । कलेजमा रहेका १ सय विद्यार्थीको कोटामा भर्ना भएका ९६ विद्यार्थीमध्ये ९ जना भारतीय, १० जना छात्रवृत्तिका र ५ जना अतिरिक्त शुल्क बुझाएका विद्यार्थीलाई मात्र पढाइरहेको छ ।सरकारले निर्धारण गरेको शुल्कमा अध्यापन पुनः सुरु नगरेसम्म आन्दोलनका कार्यक्रमहरु घोषणा गर्दे थप सशत्त आन्दोलन गर्ने चेतावनी विद्यार्थीहरुले दिएका छन् ।
