गरिमाको १५ औं वार्षिकोत्सव : प्रदेश १ मा थपिए २ शाखा, देशैभर रक्तदान

सुनसरी/ गरिमा विकास बैंकले आफ्नो १५ औं वार्षिकोत्सवको अवसरमा शाखाहरुमा रक्तदान कार्यक्रम सम्पन्न गरेको छ ।
मंगलबार बैंकको प्रदेश १ का ५ वटा शाखा सहित देशभरिका २१ वटा शाखा कार्यालयले रत्तदान कार्यक्रमको आयोजना गरेको जनाएको छ । देशै भरीबाट ११ सय ५५ पिन्ट रगत संकलन भएको छ जस मध्ये प्रदेश १ का इटहरी, धरान, विराटनगर, उर्लाबारी र बिर्तामोड शाखाबाट जम्मा तीन सय ६० पिन्ट रगत संकलन भएको गरिमा विकास बैंकका प्रदेश १ प्रमुख मीन सुवेदीले जानकारी दिए । इटहरीमा सबै भन्दा बढी १ सय २ पिन्ट रगत संकलन भएको छ । बैंकको सामाजिक उत्तरदायित्वको सिद्धान्तअन्तर्गत रक्तदान कार्यक्रमको आयोजना गरिएको सुवेदीले बताए ।

बैंकले वार्षिकोत्सवकै अवसर पारेर मङ्गलबारबाट प्रदेश १ मा २ वटा नयाँ शाखा सहित पाँच वटा नयाँ शाखाबाट बैंकिङ्ग कारोबारको सुरुवात गरेको छ । बैंकका प्रदेश १ का मोरङ्गको पथरी, सुनसरीको झुम्का सहित काठमाडौँको माछापोखरी, ललितपुरको सातदोबाटो र बर्दियाको गुलरियामा नयाँ शाखाहरु सञ्चालन भएका छन् ।

 

 

 

२०६४ असोजमा स्थापना भएको गरिमा विकास बैंकले कार्तिक १८ बाट औपचारिक कारोबार सुरु गरेको थियो । निलगिरि विकास बैंकसँग मर्ज भएपछि २०७२ साल असोज २९ गतेबाट राष्ट्रिय स्तरको कारोबार गर्ने स्वीकृति पाएको गरिमा विकास बैंक २०७३ सालमा शुभेक्षा विकास बैंकसँग पनि मर्ज भएर ठूलो विकास बैंक बनेको थियो । यसै वर्षबाट साहारा विकास बैंकसँग समेत मर्ज भएर यही कार्तिक २८ गतेदेखि एकीकृत कारोबार सुरु गरेको थियो ।

 

 

काठमाडौँको लाजिम्पाटमा मुख्य कार्यालय रहेको रहेको गरिमा विकास बैंकका देशभरि एक सय ११ वटा शाखा कार्यालयहरु सञ्चालनमा रहेका थिए । आफ्नो १५ औँ वार्षिक उत्सवको अवसर पारेर ५ वटा शाखा कार्यालय थप गरेपछि बैंकको शाखा कार्यालयको संख्या एक सय १६ पुगेको छ ।