विराटनगरका सात वडामा देखिएन कोरोना : अस्पताल भने भरिभराऊ

विराटनगर/ प्रदेश १ को राजधानी विराटनगर महानगरपालिकाका सात वटा वडामा दैनिक संक्रमण दर शुन्यमा झरेको छ । महानगरमा जम्मा १९ वटा वडा रहेका छन् ।
कोभिड १९ को पहिलो लहरमा निक्कै प्रभावित देखिएको विराटनगर महानगरपालिकामा दोस्रो लहरको संक्रमण केही मथ्थर भएजस्तो देखिएको छ । तर, चिकित्सकले जोखिम उत्तिकै कायम रहेकोले हेलचेक्र्याईं नगर्न सुझाव दिएका छन् । विराटनगरमा तुलनात्मक रुपमा प्रदेशका अन्य सहरको तुलनामा दैनिक संक्रमितको संख्या पनि घट्दो क्रममा पुगेको छ ।

साउन तेस्रो साताका पछिल्लो पाँच दिनको तथ्यांकले वडा नम्बर १३, १४, १५, १६, १७, १८ र १९ मा कोरोना संक्रमण शुन्यमा झरेको हो । संक्रमणको दर घटेपनि तीमध्ये कतिपय भारत सिमावर्ती वडासमेत भएकोले सतर्क हुन चिकित्सकले सुझाव दिएका छन् ।

महानगरको जनस्वास्थ्य महाशाखाले उपलब्ध गराएको तथ्यांकलाई आधार मान्ने हो भने साउन २१ गते यता ती वडाहरुमा शुन्य संक्रमण देखिन्छ । औसत संक्रमण दर शुन्यमा झर्नु कोरोना नियन्त्रणको अवस्थामा देखिएको महानगरको दाबी छ । तर, परीक्षणको दायरा खुम्चिएका कारण संक्रमण घटेको हुन सक्ने पनि आंकलन गरिएको छ ।
तथ्यांक अनुसार साउन २१ गते वडा नम्बर १९ मा एक जनामात्र संक्रमित फेला परेका थिए । जबकी बाँकी वडाहरुमा संक्रमितको संख्या शुन्य थियो । त्यस दिन महानगर भर कूल ७२ जना संक्रमित फेला परेका थिए । एक जनाको मृत्यु भएको थियो । साउन २२ गते वडा नम्बर १३ पनि संक्रमित संख्या शुन्य थियो । १९ मा एक जनामा संक्रमण देखियो । दैनिक संक्रमितको संख्या ४९ थियो ।

२४ गते १३ देखि १९ सम्म एक जना पनि संक्रमित फेला परेनन् । ४९ संक्रमित फेला परेको त्यस दिन कोरोनाबाट एक जनाको मृत्यु भएको थियो । साउन २५ गते वडा नम्बर १३ र १६ मा एक एक जना र १४ गते दुई जनामा संक्रमण देखियो । जम्मा ६१ संक्रमित फेला परे । साउन २५ गते वडा नम्बर १८ मा एक जना फेला परे भने बाँकी वडामा शुन्य संक्रमण थियो । वडा नम्बर १ मा पनि त्यो दिन कसैमा पनि संक्रमण देखिएन । दैनिक संक्रमितको संख्या ४२ जना थियो ।

महानगरपालिकाको तथ्यांक अनुसार हाल सक्रिय संक्रमितको संख्या २ हजार ६ सय ७९ जना छ । हालसम्म संक्रमित हुनेको संख्या १२ हजार ४ सय ४७ जना पुगेको छ । ९ हजार ६ सय ६ जना ठिक भएका छन् । पहिलो र दोस्रो लहरमा गरेर विराटनगरमा १ सय ६२ जनाको कोरोनाका कारण मृत्यु भएको छ । विराटनगर महानगरपालिकाका मेयर भीम पराजुली भन्छन्, “महानगरपालिकाका कतिपय वडामा शुन्य संक्रमण हुने गरेको देखिएको छ, तर जोखिम भनेको नघटेको हाम्रो अनुमान छ ।” उनले महानगरले परीक्षण र खोप अभियान दुबैलाई तीव्रता दिएको सुनाए । महानगरको तथ्यांकले भने अस्पतालका शैयाहरुमा कोरोना संक्रमति भरिभराउ देखिन्छन् । विराट मेडिकल कलेजमा २५ आईसियू भरिएका छन् ।

भेन्टिलेटर पनि खाली छैनन् । अक्सिजन बेड ४५ मध्ये १३ वटा खाली छन् । कोशी कोभिड अस्पतालमा आईसियूका २१ बेड भरिएका छन् । १५ भेन्टिलेटर मध्ये कुनै पनि खाली छैनन् । यसैगरी अक्सिन ६२ बेडमध्ये ६ वटा खाली छन् । १३ आइसोलेसन बेडमध्ये १० खाली छन् । उता न्युरो अस्पतामला आईसियू २५ मध्ये १४ खाली छन् । ८ मध्ये ३ भेन्टिलेटर खाली छन् ।

कोसी अस्पताल कोभिड युनिटका ५ आईसियू र ५ भेन्टिलेटर भरिभराउ छन् । ५७ अक्सिजन बेडमध्ये २३ खाली छन् । १० मध्ये ४ आइसोलेसन बेडमा बिरामी छैनन् ।
पछिल्लो समय विराटनगर महानगरपालिका भित्र दैनिक संक्रमितको संख्यामा कमी आएपनि सक्रिय संक्रमितको संख्या धेरै रहेकोेले हेलचेक्र्याई गर्ने अवस्था नरहेको कोसी अस्पतालका निमित्त मेसु डा. लक्ष्मीनारायण यादव बताउँछन् । “कोरोना संक्रमण केही घटेको देखिएको छ तर पुरै नियन्त्रण भएको होइन त्यसैले सरकारले लागू गरेका स्वास्थ्य सम्बन्धी मापदण्ड कडाईसाथ पालना गर्नुपर्छ,” डा. यादवले भने, “अस्पतालमा कडा लक्षणसहितका बिरामीको संख्या हेर्दा भने अवस्था सामान्य भएको भन्ने देखिदैंन ।”