_1611147491.gif "#")
विराटनगर/ कोरोना संक्रमणका बेला उपचारमा खटिएका विराटनगरको काशी अस्पताल कोभिड १९ उपचार केन्द्रका स्वास्थ्यकर्मीले अझै जोखि भत्ता पाउन सकेका छैनन् ।
कोभिडको पहिलो लहरका बेला खटिएका २४ स्वास्थ्यकर्मीले जोखिम भत्ता प्राप्त नगरेको बताएका छन् । प्रदेश १ सरकारले सञ्ंचालन गरेको अस्पतालमा खटिएका चिकित्सकले सामाजिक विकास मन्त्रालयमार्फत भत्ता पाउनु पर्नेथियो । तर, गत वर्षको मंसिरदेखिकै भत्ता नपाएको स्वास्थ्यकर्मीको भनाई छ । केपी ओलीको सरकारकै पालामा दिने भनिएको जोखिम भत्ता ८ जना मेडिकल अधिकृत, ८ जना एचए र ८ जना स्टाफ नर्सले प्राप्त गर्न नसकेका हुन ।
प्रदेश सरकारले २०७७ भदौ २१ देखि फागुन २० गतेसम्म सम्झौता गरेर ६ महिनासम्मको नियुक्ति दिएर २४ स्वास्थ्यकर्मीलाई खटाएको थियो । पहिलो लाइनमा बसेर काम गर्ने स्वास्थ्यकर्मीलाई शतप्रतिशत र दोस्रो लाइनमा खटिनेलाई ५० प्रतिशत जोखिम भत्ता दिने निर्णय भएको थियो ।
आफूहरुले चार महिनाको जोखिम भत्ता नपाएको हेल्थ असिस्टेन्ट दिलिप सिंहले बताएका छन् । भने,“सामाजिक विकास मन्त्रालयमा बारम्बार ताकेदा पनि गरेका थियौं । हुन्छ हुन्छ भन्ने जवाफ आउँछ तर भत्ता वापतको रकम भने पाइएको छैन ।”
मन्त्रालयका सचिव गोविन्दबहादुर कार्कीले दुई महिनाको मात्र सरकारले जोखिम भत्ता दिने भनेको दाबी गरे । कात्तिकदेखिको जोखिम भत्ता कटौती भएको उनले दाबी गरे । कोसी कोभिड अस्पतालमा औषधि खरिददेखि उपकरण मर्मत लगायतमा अनियमितता भएको भन्दै प्रदेशसभा बैठकमा सांसदले प्रश्न उठाएका थिए । अस्पतालका खरिद टुक्र्याएर टेन्डर बिना गर्ने गरेको पाइएपछि सामाजिक विकास मन्त्री उषाकला राईले रोकेकी थिइन ।
