विराटनगर । नेपाली कांग्रेसले प्रदेश नम्बर १ सरकारले बन्द भएको कोभिड अस्पताल चलिरहेको भन्ने झुटो अभिव्यक्ति दिएर जनता र सांसदलाई गुमराहमा राख्ने काम गरेको भन्दै आपत्ती जनाएको छ ।
नेपाली कांग्रेसका प्रमुख सचेतक केदार कार्कीले विहीबारको प्रदेशसभा बैठकमा विशेष समय लिएर बोल्दै सरकारले दश दिनमा तयार गरेको भनिएको कोसी कोभिड अस्पताल बन्द रहेको बताए ।
उनले भने,“तर सरकारका मन्त्रीहरु अहिले पनि कोसी अस्पताल संचालनमा रहेको छ भन्दै झुट प्रचार गरिरहनु भएको छ । बन्द भएको अस्पताललाई खुला छ भनेर झुट बोल्ने ? के त्यो अस्पताल खुला छ ?” हाल कोसी कोभिड अस्पताल परिसरमा विराटनगर महानगरपालिका, उद्योगी व्यवसायी र नागरिकको सहयोगमा निर्माण भएको नागरिक केयर सेन्टर मात्र संचालनमा रहेको सदन समक्ष जानकारी गराए । उनले सदनमा झुटो बोल्न नदियोस भन्दै सभामुखको ध्यानाकर्षण गरे ।
कार्कीले कोसी कोभिड अस्पताल संचालन नभएको बरु लामो समयदेखि बन्द रहेको बताए । कार्कीले मुख्यमन्त्री शेरधन राईको सम्पर्क कार्यालयको नाममा करोडौं रकम खर्च भईरहेको बताउँदै भने,“प्रदेश सरकारको पैसा काठमाडौमा कार्यालय खोलेर खर्च गर्न पाइँदैन ।
संघीय सरकारले अपार्टमेन्ट दिएको भनिएको छ किन चाहियो सम्पर्क कार्यालय ?” कार्कीले कोसी टप्पु बन्यजन्तु आरक्षको सप्तकोसी उकासको जमिन लिजमा दिने निर्णय गर्नु जनताको पक्षमा नरहेको बताए । निलहरि काफ्लेको नाममा दिइएको लिज मान्य नहुने कार्कीले जिकिर गरे ।