_1693980289.gif "#")
विराटनगर । प्रदेश १ मा दैनिक कोरोना संक्रमणको संख्या चार सयभन्दा कम हुन थालेको छ । संक्रमित थपिने भन्दा संक्रमणमुक्त हुनेको संख्या पछिल्लो दुई सातायता बढ्न थालेको हो ।
बुधबार १ हजार २८१ जना कोरोना संक्रमणमुक्त भएकामा ५२८ महिला र ७५३ पुरुष रहेका छन् । मोरङबाट मात्र ५६३ जना संक्रमणमुक्त भएका हुन । हालसम्म कोरोना संक्रमणमुक्त हुनेको संख्या ५१ हजार ७५ पुगेको छ ।
प्रदेश १ मा कोरोना संक्रमितको संख्या ६६ हजार ८३५ पुगेको छ । संक्रिय संक्रमितको संख्या १४ हजार ६९३ रहेको छ । बुधबार परीक्षण गरिएकामध्ये मध्ये १८८ महिला र २०६ जना पुरुषको रिपोर्ट पोजेटिभ आएको सामाजिक विकास मन्त्रालयले जनाएको छ ।
मंगलबार प्रदेश १ मा ५५७ जना संक्रमणमुक्त भए । जसमा २३२ महिला र ३२५ पुरुष थिए । जवकी त्यो दिन ३८५ जना कोरोना संक्रमित थपिए । सोमबार प्रदेश १ मा ३७९ जना कोरोना संक्रमित थपिएका थिए । यसैगरी आइतबार १ हजार ३१० जना संक्रमणमुक्त भए । जसमा ५२४ महिला र ७८६ पुरुष थिए । आइतबार ४८६ जना कोरोना संक्रमित थपिएका थिए ।
प्रदेश १ को सबैभन्दा बढी संक्रमित भएको जिल्ला मोरङ हो । त्यसमा पनि राजधानी विराटनगर अधिक प्रभावित छ । विराटनगरमा पनि संक्रमितको संख्या घट्दो क्रममा पुगेको छ । आइतबार विराटनगरमा ११७, सोमबार ५६,मंगलबार ५८ जना र बुधवार विराटनगरमा ६३ जनामात्र नयाँ संक्रमित थपिए छन् । सक्रिय संक्रमितको संख्या साढे सात हजारभन्दा धेरै छ ।
कोसी अस्पतालका मेसु चुमनलाल दास दुई सातायता कोरोना संक्रमितको संख्या तुलनात्मक रुपमा कमी आएको बताउँदै भन्छन्,“तर, जोखिम घटिसकेको छैन । संक्रमण पुरै भागेको होइन स्वास्थ्य सावधानी भने अपनाउनै पर्छ ।” उनले समाजमा खोपको माध्यमबाट ठूलो मात्रामा हर्ड इम्युनिटी सिजर्ना नगरुन्जेल संक्रमणको उच्च जोखिम रहने बताए ।
