_1693980289.gif "#")
इटहरी: इटहरीको एक गोदामबाट डेढ सय मन अलैँची रहस्यमय ढङ्गले रातारात गायब भएको छ ।खोटाङ जिल्लाबाट ल्याइएको अलैँची जनता बस्तीको गोदाममा राखिएको थियो ।
गत पुस ४ गते राति नै इटहरी ल्याइएको अलैँची भोलिपल्ट खोजी गर्दा गोदाममा नभेटिएपछि रातारात गायब बनाइएको रहस्य खुलेको थियो ।
आफूहरू साहु भएको बताउँदै अलैँची मगाएर रातारात गायब बनाएपछि आफूहरू झुटो व्यापारीबाट ठगिएको भन्दै अलैँची किसान खोटाङका युवराज राईले यहाँस्थित इलाका प्रहरी कार्यालयमा उजुरी दिएका थिए ।
सोही उजुरीका आधारमा अनुसन्धान गर्ने क्रममा इटहरी प्रहरीले चारजनालाई नियन्त्रणमा लिएर कारवाही प्रक्रिया अगाडि बढाएको छ । पक्राउ पर्नेहरूमा हाल झापाको बिर्तामोड-४ मा बस्ने खोटाङको जन्तेढुङ्गाका मातृकाप्रसाद पोख्रेल, दोलखाको बिगु-८ का दीपककुमार घिमिरे नाम बताउने केशव दाहाल, इटहरी-७ का सरोज बोहोरा र भोजपुरको रामप्रसाद राई गाउँपालिका-६ का कमल थापा रहेको प्रहरीले बताएको छ ।
इटहरी प्रहरीले बिहीबार पत्रकार सम्मेलन गर्दै चारैजनालाई सार्वजनिक गरेको छ । चारमध्ये मातृका र केशवको साथबाट सूचना विभागबाट जारी भएको पत्रकार परिचयपत्रसमेत बरामद भएको छ ।
इटहरीका डीएसपी अर्जुन केसीका अनुसार पीडितले उजुरी दिएलगत्तै ‘अपरेसन ब्ल्याक गोल्ड’ नाम राखेर अनुसन्धान सुरू गरिएको थियो । इटहरीका विभिन्न स्थानबाट चारजनालाई पक्राउ गरिए पनि अन्य भने फरार रहेको डीएसपी केसीले बताए ।
चारजनाको साथबाट आठ थान मोबाइल र त्यसमा प्रयोग भएका सिम कार्डसमेत बरामद भएको प्रहरीले जनाएको छ । पक्राउ परेकामध्ये केशवको साथबाट सङ्घीय समाजवादी फोरम नेपालको सदस्यतापत्र पनि भेटिएको प्रहरीले बताएको छ ।
केशवले कृषक राईलाई फोन गरेर आफूठूलै व्यापारी भएको बताउँदै राम्रै रकम दिने भनी खोटाङबाट अलैँची मगाएको र रातारात अरूलाई नै बिक्री गरेको अनुसन्धानको क्रममा खुलेको पाइएको छ ।
ठूलो परिमाणमा अलैँची गायब भएको सूचना पाउनासाथ प्रदेश एक प्रहरी कार्यालय र इप्रका इटहरीका टोलीले एकैसाथ अनुसन्धान अघि बढाएका थिए । त्यस क्रममा पुस ४ गते यहाँ आइपुगेको अलैँची जनता बस्तीबाट राति नै हलगडा सारेर प्रतिमन २५ हजार रुपैयाँका दरले अरूलाई बिक्री गरेको भेटिएको थियो ।
अलैँची लिएर खोटाङको साकेला गाउँपालिका-२ का युवराज राई पनि यहाँ आएका थिए । ठगी गर्ने समूहले त्यस दिन राति भएको बताउँदै पैसा लिन बिहान आउनू भनी राईलाई पठाएर रातारात अलैँची अन्यत्रै सारेको थियो । बिहान पैसा लिन जाँदा गोदाममा ताला लगाइएको र पटक-पटक फोन गर्दा पनि स्वीच अफ भएको पाइएपछि ठगिएको पक्का भएको थियो ।
पक्राउ परेका चारैजनाविरूद्ध डाका, चोरी, ठगी, आपराधिक विश्वासघात, आपराधिक लाभ र सङ्गठित अपराध ऐनअन्तर्गत म्याद थप गरी थप अनुसन्धान प्रक्रिया अघि बढाइएको डीएसपी केसीले बताए ।
