वराहक्षेत्र नगरपालिका १ नम्बर वडा कार्यालयले नयाँ भवनमार्फत प्रशासनिक काम थालेको छ । स्थानीय सरकार सन्चालनपछि साविक गाविस भवनबाटै सेवा तथा प्रशासनिक काम गरिरहेको वडा कार्यालयले आइतबारदेखि आफ्नै नयाँ प्रशासनिक भवनमार्फत काम थालेको वडाध्यक्ष सुरेश श्रेष्ठले जानकारी दिए । वराहक्षेत्र १ स्थित खारखोला 'राष्ट्रिय झण्डा चोक'मा नयाँ कार्यालय भवन स्थापना भएको छ । नेपाल सरकारद्वारा आव ०७५/७६ मा भवन निर्माणका लागि ७० लाख रुपैयाँ विनियोजन भएको थियो । ठेक्का प्रणालीमार्फत ५३ लाखमा निर्माण सम्पन्न भएको वडासचिव लक्ष्मण पौडेलले जानकारी दिए । १ तले भवनमा वडाध्यक्ष, वडा सचिव, प्रशासनिक कक्ष, जनप्रतिनिधि कक्ष, सभा हल ५ कोठा छन । महिला, पुरुष र अपाङ्गमौत्री र कर्मचारी शौचालय निर्माण गरिएको छ । वडा कार्यालय भवन निर्माणका लागि जग्गादाता भीम श्रेष्ठले ११ कट्ठा जग्गा दान गरेका थिए ।