_1693980289.gif "#")
धरानः शिक्षाको लागि च्यारिटी दौड नारा दिएर बर्षेनी आयोजना हुदै आएको धरान १० के रन, नवौं नेवा च्यारिटी आगामी फागुनमा हुने भएको छ ।
धरान रन समुहले शनिबार कार्यालयमा पत्रकार सम्मेलन गर्दै फागुन ८ गते दौड प्रतियोगिता आयोजना गर्ने जानकारी दिएको हो । समुहका अध्यक्ष रमु राईका अनुसार यसपाली विगतको भन्दा फरक तरिकाले दौड प्रतियोगिता आयोजना हुनेछ ।
स्टे फिट एण्ड हेल्थी, फाइट अगेन्स्ट कोभिड १९ नारासहित आयोजना हुने प्रतियोगितामा बढीमा एक सय जना मात्र धावक धाविकाहरु सहभागी गराउने अध्यक्ष राईले बताए । ‘हामीले कोभिड १९ को कारण विगतमा जस्तो भव्यरुपमा यसपाली नगर्ने, र बढीमा उत्कृष्ट धावकधाविका इलिट रनर्सहरुलाई मात्र १०० जना सहभागी गराउने निर्णय भएको छ,’उनले भने ।
समुहका अनुसार पुरुषतर्फ १० किलोमिटर रुटमा ४० मिनेट रेकर्ड अवधि भएकाले मात्र सहभागी हुन पाउनेछन् भने महिलातर्फ ५० किलोमिटर रेकर्ड अवधि भएकाले मात्र सहभागी हुन पाउछन् ।
यसको लागि सहभागीहरुले आफ्नो रेकर्ड देखाउनुपर्नेछ । विगतमा भन्दा कम समयमा समापन कार्यक्रम गरिने पनि उनले बताए । उत्कृष्ट राष्ट्रिय तथा अन्तराष्ट्रिय धावकधाविकाहरु समावेश हुने र च्यारिटी कार्यक्रम पनि भएकोले दर्ता शुल्क भने १ हजार लिने उनले बताए ।
प्रतियोगतामा विगतमा जस्तो विभिन्न उमेर समुह नहुने भएकोले यसपटक खुला क्याटगोरी मात्र हुनेछ । महिला र पुरुषतर्फ पहिलो हुनेले नगद ५० हजार, दोस्रो हुनेले ३० हजार र तेस्रो हुनेले २० हजार पुरस्कार पाउनेछन् भने चौथो र पाँचौं स्थान हुनेलाई पनि सान्त्वना पुरस्कार, आकर्षक मेडल र प्रमाणपत्र दिइने पनि समुहका सहसचिव राजेन्द्र हुक्पा चोङवाङ लिम्बुले जानकारी दिए ।
कार्यक्रमबाट खर्च कटाएर जोगाएको रकम धरान रन समुहको मातहतमा रहेको नेवा एजुकेशन फण्डमा जम्मा गरिने पनि उनले बताए । यो फण्डबाट सामुदायिक विद्यालयका २४ जना जेहेन्दार विद्यार्थीलाई छात्रवृद्धि दिइरहेको र निरन्तरता दिने समुहको भनाई छ ।
