_1693980289.gif "#")
धरान । सरकारको निर्णय कार्यान्यवन गरेको भन्दै धरान स्थित वीपी कोइराला स्वास्थ्य विज्ञान प्रतिष्ठानले कोरोना संक्रमितको उपचारका लागि धरौटी राखे पछि मात्रै उपचार गरिने जनाएको छ ।
प्रतिष्ठानका अस्पताल निर्देशक प्रा.डा. गौरी शंकर शाहले सुचना जारी गर्दै ४ वटा वर्गिकरण गरेर उपचार खर्च र धरौटी रकम राख्नुपर्ने जनाएको हो । कार्तिक ९ गते देखि लागु हुने गरि धरौटी रकम र उपचार खर्च सार्वजनिक गरेको छ । उनका अनुसार कुनै लक्षण नभएका संक्रममितलाई ७ हजार धरौटी राख्नुपर्नेछ भने प्रतिदिन २ हजार शुल्क तिर्नुपर्नेछ । हल्का लक्षण भएकाले १२ हजार धरौटी भर्ना हुनु अघि नै राख्नुपर्नेछ भने प्रतिदिन ३५ सय शुल्क तिर्नुपर्नेछ । मध्यम लक्षण भएका बिरामीले ३५ हजार धरौटी बुझाउनु पर्नेछ भने प्रतिदिन शुल्क ७ हजार ५ सय तिर्नुपर्नेछ । त्यस्तै, गम्भीर लक्षण भएका बिरामीले ६० हजार धरौटी बुझाउनुपर्ने भएको छ भने प्रतिदिन १५ हजार शुल्क तिर्नुपर्ने सूचनामा उल्लेख छ ।
आर्थिकरुपले विपन्न, अशक्त, असहाय एकल महिला, अपाङ्गता भएका नागरिक, ज्येष्ठ नागरिकहरुलाई लक्षण देखिएमा सिफारिस तथा परिचय पत्रको अधारमा निःशुल्क पिसिआर परीक्षण गर्ने प्रतिष्ठानले जनाएको छ । अन्य सबैलाई २२ सय रुपैयाँ पिसिआर शुल्क लाग्ने पनि जनाएको छ ।
नेपाल सरकार, स्वास्थ्य तथा जनसङ्ख्या मन्त्रालय मातहतको स्वास्थ्य आपतकालिन तथा विपत् व्यवस्थापन इकाई, काठमाडौवाट निर्णय भए अनुसार प्रतिष्ठानले पनि यस्तो निर्णय गरेको उनले बताए । यसैगरी लक्षण नभएमा वा लक्षण हराएमा संक्रमित बिरामीहरूलाई १४ दिनमा डिस्चार्ज गर्ने गरिएकोमा अब देखि ३ दिनमा चिन्ह वा लक्षण नदेखिएमा १० दिनमा डिस्चार्ज गर्ने भएको छ । त्यस पश्चात् बिरामीले ७ दिन होम आइसोलेसनमा अनिवार्य बस्नु पर्ने जनाएको छ ।
