दुई महिना पछि धरान उपमहानगरपालिकाको बैठक सम्पन्न, खानेपानी संस्थानलाइ कार्तिक २६ गते बोर्डमा मर्ज गर्ने निर्णय

धरान । लामो समय देखि को बिबादित खानेपानी बोर्डको समस्या समाधान तर्फ धरान उपमहानगरपालिका उन्मुख रहेको छ ।
विभिन्न बहानामा अवरुद्ध हुँदै आएको खानेपानी बोर्डको समस्या समाधानका लागि धरान उपमहानगरपालिकाको कार्यपालिकाको बैठक टुंगोमा पुगेको छ । करिब २ महिना पछि बसेको धरान उपमहानगरपालिकाको कार्यपालिका बैठकले खानेपानी संस्थानलाई कार्तिक २६ गते खानेपानी व्यवस्थापन बोर्डमा मर्ज गर्ने निर्णय गरेको छ ।

लामो समय देखि बिबादित बनेको संस्थानको सम्पती तथा दायित्व बोर्डमा औपचारिकरुपमा नै कार्तिक २६ गते संस्थानलाई बोर्डमा हस्तान्तरण गरि मर्ज गर्ने बैठकले निर्णय गरेको छ । पटक पटक संस्थानलाई बोर्डमा मर्ज गर्ने निर्णय गरेपनि कार्यान्वयन हुन भने सकेको छैन ।

यस्तै, बैठकले खोलाजन्य बस्तुको पनि दररेट कायम गरेको छ । ढुंगा, गिट्टी, बालुवा, दररेट निर्धारण नहुँदा योजनाको लागतस्टिमेट हुन सकिरहेको थिएन । बैठकले दररेट पनि कायम गरेको र अब योजनाहरु अघि बढाउन सहज भएको अध्यक्ष भट्टराईले जानकारी दिए ।

बैठकले धरान १७ स्थित एन्फा क्वारेन्टिनलाई न्युनतम मापदण्ड पुरा गरेर आइसोलेसन बनाउने पनि निर्णय गरेको छ । पछिल्लो समय वीपी प्रतिष्ठानमा आइसियु तथा भेन्टिलेटर बेडहरु संक्रमितले पाउन नसकेको चौतर्फी गुनासो हुन थालेपछि उपमहानगरपालिका आफैले अक्सिजनलगायत न्युनतम मापदण्ड पुरा गरेर आइसोलेसन बनाउने निर्णय गरेको हो । यस्तै, भेडेटारस्थित शैलुंग डाँडामा निर्माण हुन लागेको स्काईवाक परियोजनालाई अनुमोदन गर्दै बैठकले जलाधार क्षेत्रलाई प्रभाव नपर्ने गरि जग्गा लिजमा उपलब्ध गराउने पनि निर्णय गरेको छ ।

यस्तै, धरान १३ स्थित वीपी पार्क र धरान १७ स्थित सप्तरंगी पार्कलाई विकास गर्न सँस्कृति तथा नागरिक उड्यायन मन्त्रालयमा पठाएको प्रस्तावलाई बैठकले अनुमोदन गरेको छ ।