पछिल्लो २४ घण्टामा धरान र विराटनगरमा दश संक्रमितको मृत्यु

विराटनगर । पछिल्लो २४ घण्टामा विराटनगर र धरानमा दश जना कोरोना संक्रमितको मृत्यु भएको छ । विराटनगरमा ७ र धरानमा ३ जनाको मृत्यु भएको हो ।

कोसीसहित विराटनगरका विभिन्न कोभिड अस्पतालहरुमा उपचार गराइरहेका ५ महिला र २ पुरुषको मृत्यु भएको अस्पतालले जनाएका छन ।

कोसी अस्पताल कोभिड–१९ उपचार केन्द्रमा तीन, विराट नर्सिङ होममा एक, न्युरो अस्पतालमा एक, विराट मेडिकल कलेजमा एक र नोबेल मेडिकल कलेजमा अर्का एकजनाको मृत्यु भएको हो । मोरङको कटहरी गाउँपालिका–२ आदर्श टोलकी २१ वर्षीया युवतीको मंगलबार बिहान ५ः३० बजेतिर कोसी कोभिड उपचार केन्द्रमा मृत्यु भएको अस्पतालले जनाएको छ । उनमा कोरोना संक्रमण देखिएपछि आइतबार अस्पताल भर्ना गरिएको थियो । सोही अस्पतालमा विराटनगर–१२ की ६४ वर्षीया वृद्धाको पनि मंगलबार बिहान मृत्यु भएको छ ।

उपचार केन्द्रका व्यवस्थापक ज्ञानबहादुर बस्नेतले इटहरी उपमहानगरपालिका–५ का ३८ वर्षीय पुरुषको सोमबार साँझ मृत्यु भएको बताए । होम आईसोलेसनमा रहेका उनमा श्वास प्रश्वासमा समस्या भएपछि सोमबार दिउँसो कोसी ल्याइएको थियो ।
न्युरो अस्पतालमा उपचाररत विराटनगर–१० की ६४ वर्षीया वृद्धाको मृत्यु भएको छ । विराटनगर–७ की ९६ वर्षीया वृद्धा महिलाको नोबेल मेडिकल कलेजमा मृत्यु भएको छ । मोरङको रंगेली नगरपालिका–३ का ८५ वर्षीय वृद्ध पुरुषको उपचारका विराट नर्सिङ होममा मृत्यु भएको छ । विराट शिक्षण अस्पतालको आइसोलेसनमा झापाको बिर्तामोड–४ की ७६ वर्षीया संक्रमित वृद्ध महिलाको मंगलबार निधन भएको छ ।

यता, विराटनगरको कोसी अस्पतालमा सोमबार राति रतुवामाई नगरपालिका–४ का ४० वर्षीय पुरुषको पनि मृत्यु भएको छ । उनको भने पीसीआर परीक्षणको रिपोर्ट आउन बाँकी छ ।
सुनसरीको धरानस्थित बीपी कोइराला स्वास्थ्य विज्ञान प्रतिष्ठानको कोभिड अस्पतालमा तीन जना संक्रमितको मृत्यु भएको छ । मृत्यु हुनेमा धरान–३ का ७२ वर्षीय, धरान–१७ का ६८ वर्षीय र इटहरी उपमहानगरका ५६ वर्षीय पुरुष रहेको प्रतिष्ठानले जनाएको छ । धरानमा मंगलबार थप २ सय ८५ जनामा कोरोना संक्रमण पुष्टि भएको छ ।