_1693980289.gif "#")
धनकुटा÷धनकुटाका विभिन्न स्थानहरुमा प्राकृतिक रुपमा उम्रिएको अबैध गाँजा फडानीलाई प्रहरीले तिब्रता दिएको छ ।
जिल्ला प्रहरी कार्यालय धनकुटाको निर्देशनमा मातहतका प्रहरी चौकीहरुको सक्रियतामा जिल्लाका विभिन्न स्थानमा प्राकृतिक रुपमा उम्रिएका करिब २२ हजार बोट गाँजा फडानी गरी नष्ट गरिएको छ ।
जिल्लाको सबैभन्दा बढी गाँजा उत्पादन हुने क्षेत्र सहिदभूमि गाउँपालिका–२, ३ र ४ वडाको साम्बु गाउँ, पाताल, तिलुवाटार र ढोलमुखा लगायतका स्थानमा प्राकृतिक रुपमा उम्रिएको ३३ रोपनी क्षेत्रफलमा रहेको १० हजार ९ सय ५० बोट गाँजा नष्ट गरिएको जिल्ला प्रहरी कार्यालय धनकुटाका एसपी गोविन्द अधिकारीले बताए । सो क्षेत्रमा केही बर्ष पहिले व्यवसायिक रुपमा गाँजा खेती हुदै आएको थियो । तर स्थानीय प्रशासनको सक्रियतामा हरेक वर्ष गाँजा फडानी गर्दै आएपछि स्थानीयहरुले त्यसको विकल्पको रुपमा खेती शुरु गरेका थिए ।
अहिले सो क्षेत्र लगायतका विभिन्न स्थानमा प्राकृतिक रुपमा गाँजा उम्रिएपछि प्रहरीले फडानी अभियानलाई तिब्रता दिएको हो । प्राकृतिक रुपमा उम्रिएको चौबिसे गाउँपालिका–६ मिलनचोकमा एक रोपनी क्षेत्रफलमा रहेको १ सय बोट, धनकुटा नगरपालिका–५, ६ र ७ मा ३१ रोपनी जग्गामा फैलिएको ८ हजार बोट, महालक्ष्मी नगरपालिका–९ मा स्थित स्थानीयहरुको पाखाबारीमा एक रोपनी जग्गामा उम्रिएको ४४ बोट, धनकुटा नगरपालिका–३ मा ११ रोपनी क्षेत्रफलमा रहेको २ हजार ८ सय ५० बोट गाँजा नष्ट गरिएको एसपी अधिकारीले बताए । प्रहरीले गाँजा नष्ट गर्ने अभियानलाई जिल्लाभरी नै निरन्तरता दिईरहेको प्रहरीले बताएको छ ।
