वराहक्षेत्र कटहरेकी बालिकाकाे हत्या आशंकामा ६ जना पक्राउ

बराहक्षेत्र । शुक्रबार राती मृत भेटिएकी एक बालिकाको हत्याको आशंकामा इलाका प्रहरी कार्यालय बराहक्षेत्रले ६ जना युवाहरुलाई नियन्त्रणमा लिएको छ ।
बराहक्षेत्र नगरपालिका वडा नं. १ कटहरेस्थित आफ्नै घरमा १२ वर्षीया बालिका मिना राईको हत्याको अनुसन्धानका लागि संघीय प्रहरी इकाईबाट तालिम प्राप्त कुकुर सहितको टोलि खटेको थियो ।

तालिम प्राप्त कुकुरहरुले १ सय ५० मिटर परको एउटा घरमा पसे पछि त्यस घर सहित उनका अन्य साथीहरुलाई आशंकामा अनुसन्धानका लागि प्रहरीले पक्राउ गरेको इलाका प्रहरी कार्यालय महेन्द्रनगरका प्रहरी निरिक्षक पाण्डव राजवंशीले बताए ।

शुक्रबार आफ्नै घरको कोठामा मृत भेटिएकी बालिका राईको टाउकोमा दुई तीन ठाउँ चोट र घाँटीमा रुमाल र टिसर्ट बेरिएको अवश्थामा पाइएको थियो । घटनास्थलमा इलाका प्रहरी कार्यालय चक्रघटी, चतरा प्रहरी चौकीका प्रहरी र स्थानीय जनप्रतिनिधिहरु पुगेका थिए ।

शुक्रबार राती छिमेकीमा धामी बसेको हेर्न बालिका मिना उनका आमा बुवासहित गएकी थिईन् तर उनी आमाबुवा भन्दा अघि नै फर्किएकी थिईन् । धामी हेरेर अबेर बाबुआमा फर्कीदा बालिका घरमै मृत अवश्थामा फेला परेकी थिईन् ।

घटनास्थल वरपर वियरका बोतलहरु थिए । त्यसमध्ये एउटा बोतल फुटेको अवश्थामा भेटिएको र शवको अवश्था हेर्दा हत्या भएको प्रष्ट देखिने घटनस्थल पुगेका वडा नं. १का वडासदस्य लोकबहादुर दाहालले बताए ।