_1693980289.gif "#")
धनकुटा / धनकुटा नगरपालिकाको वडा नं. ५ मा एक जना महिलामा आज कोरोना भाइरसको संक्रमण देखिएपछि सो वडाको केही क्षेत्रमा निषेधाज्ञा जारी गरिएको छ ।
कोभिड–१९ संकट व्यवस्थापन केन्द्र धनकुटाको आज सम्पन्न आकस्मिक बैठकले कोरोना भाइरसको संक्रमण अन्य क्षेत्रमा फैलिनबाट रोक्नको लागि सो क्षेत्रमा निषेधाज्ञा घोषणा गरिएको हो । बैठकले धनकुटा नगरपालिका–५ को गोकुण्डेश्वर बालमन्दिर माविदेखि पूर्व वडा नं. ६ को भिमसेन थान मन्दिर जाने सडकको पश्चिम जिल्ला प्रहरी कार्यालय रहेको वडा नं. ६ को सडक बाटोको उत्तर र वडा नं. ६ कै बौद्धिक विकास समाजको क्रियाघर रहेको खोल्सी देखि दक्षिण चार किल्ला भित्र आज राति वा भदौ ३१ गते राति १२.०० बजेदेखि असोज ६ गते राति १२.०० बजेसम्मको लागि अतिआवश्यक कामकाज बाहेक आवत जावत पूर्ण निषेध गरिएको सहायक प्रमुख जिल्ला अधिकारी भोजराज श्रेष्ठले बताए ।
संक्रमण रोग ऐन, २०२० र स्थानीय प्रशासन ऐन, २०२८ बमोजिम कोरोना भाइरसको संक्रमण समुदायस्तरमा बढ्न नदिनको लागि गरिएको निषेधाज्ञाको कसैले उल्लंघन गरे कानुन बमोजिम कडा कारवाही हुने जिल्ला प्रशासन कार्यालय धनकुटाद्धारा जारी सुचना जनाइएको छ । धनकुटामा आज देखिएको एक जना सहित ४५ जनामा कोरोना भाइरसको संक्रमण देखिएको छ । ती मध्ये ४० जना कोरोना मुक्त भएका छन् भने ५ जना उपचाररत छन् ।
