_1693980289.gif "#")
प्रतीकात्मक तश्वीर
धरान । दलित बालिका घर भित्र पसेको भन्दै बालिकालाइ कुटपिट गर्ने परिवार विरुद्धको जाहेरि प्रहरीले दर्ता गरेको छ । मोरङको उर्लाबारी ४ स्थित थापाडागी एक गैरदलित परिवारले दलित समुदायकी १२ बर्षिय फुलसरी मङ्रातीलाई घर पसेको निहुमा कुटपिट गरेका थिए । दलित भएको कारण गालीगलौज गरेर कुटपिट गरेको विरुद्धमा बालिकाकी संरक्षक दुर्गाकुमारी रोक्काले दिएको जाहेरी प्रहरीले दर्ता गरेको हो ।
यसअघि प्रहरीले जाहेरी लिए पनि दर्ता गर्न आनाकानी गरेको थियो । दुर्गाकुमारीले इलाका प्रहरी कार्यालय उर्लाबारीमा जातीय विभेद तथा छुवाछुत कसुर गरेको अभियोगमा जाहेरी दर्ता गराएकी थिइन । प्रहरीले जाहेरी लिएपछि दुर्गाकुमारीले न्यायको आश जागेको बताइन् । ‘हिजो दर्ता गर्न नमान्दा त प्रहरी पनि हाम्रा पक्षमा नहुने रहेछन् भन्ने लागेको थियो’, उनले भनिन्, ‘अधिकारकर्मी र पत्रकारले दबाब लिएपछि जाहेरी लियो । अब न्याय पाउँछु भन्ने आश छ ।’
जाहेरी दर्ता गरे पनि पीडक पक्ष र जनप्रतिनिधिले मिलापत्र गर्न भन्दै जाहेरी फिर्ता लिन दबाब दिइरहेको छ । उनीहरुले अधिकारकर्मी र पीडित पक्षलाई भेटेर समाजमा फेरि पनि बस्न पर्ने भन्दै दबाब दिइरहेका छन् ।
१२ वर्षीय असहाय बालिका फूलसरी माथि २२ भदौमा जातीय रूपमा होच्याउँदै कुटपिट भएको थियो । छिमेकी नन्दलाल श्रेष्ठ, उनकी श्रीमती निर्मला र उनका छोरा अम्वीर श्रेष्ठले दलित बालिका घरभित्र पसेको भन्दै २२ सोमबार निर्घात कुटपिट गरेका थिए । कुटपिटबाट बालिकाको शरीरभरि नीलडाम र भित्री चोट लागेको छ । चिसो पानी(आइस) लिन छिमेकी तुलसा खतिवडा श्रेष्ठको घरमा गएकी फूलसरीलाई उनीहरूले कुटपिट गरेका हुन् । तल्लो जातकी बालिका घरभित्र पसेको भन्दै उनीहरूले जातीय रूपमा होच्याउने शब्द प्रयोग गरेर गालीगलौज गर्दै कुटपिट गरेका थिए ।
कुटपिट भएकी बालिकाका आमाबुबा बेपत्ता छन् । उनी उर्लाबारी–४ स्थित आफन्त दुर्गाकुमारी रोक्काकहाँ बस्दै आएकी छन् । रोकाको परिवारलाई यसअघि पनि श्रेष्ठ परिवारले जातीय रूपमा होच्याउँदै आएको थियो । ‘केही महिना पहिले पनि कुटेका थिए । छिमेकी भएकाले उनीहरूकै घरको बाटो हिँड्नुपर्छ । त्योबाटो हिँड्दा पनि जातकै कुरो निकालेर थुक्छन् । गालि गलौज गर्छन् । यसपटक सानो नानीको चोट लागेको ठाउँमा सेक्न आइस लिन गएको बेला तँ सर्किनि श्राद्धका बेला हाम्रो घरमा किन पसेको भन्दै कुटपिट गरे, छुट्याउन जाँदा म माथि पनि हातपात गरे ।’ उनले भनिन ।
सोमबार पनि बालिका फूलसरीलाई जातीय रूपमा होच्याउँदै श्रेष्ठ परिवारका आमाछोराले कुटपिट गरेको दुर्गाको आरोप छ । फूलसरीलाई कुटपिट गर्दै गर्दा छुट्याउँदै दुर्गाकुमारीमाथि समेत कुटपिट भएको थियो ।
कुटपिटमा संलग्न एकजना पक्राउ इलाका प्रहरी कार्यालय उर्लाबारीले एक जना आरोपितलाई पक्राउ गरेको छ । कुटपिट र जातीय विभेदमा संलग्न अम्वीर श्रेष्ठलाई पक्राउ गरेको हो । उनीमाथि अहिले अनुसन्धान भइरहेको छ । अन्य दुई आरोपितलाई पनि अदालतबाट पक्राउ आदेश लिएर पक्राउ गरिने प्रहरीले जनाएको छ ।
