धनकुटा बहुमुखी क्याम्पसमा आज तालाबन्दी

धनकुटा, २५ साउन / धनकुटा बहुमुखी क्याम्पस धनकुटामा कार्यरत आंशिक प्राध्यापकहरुले क्याम्पसमा आज तालाबन्दी गरेका छन् ।

आंशिक प्राध्यापकहरुलाई करारमा नियुक्ति गर्न माग गर्दै उनीहरुले क्याम्पस प्रमुखको कार्यकक्षमा तालाबन्दी गरेका हुन् । समान कामको समान ज्याला सहित आंशिक प्राध्यापकहरुको दिगो व्यवस्थापन (करार) र पेशागत ग्यारेन्टी गर्नु पर्ने, आंशिक प्राध्यापकसँग भएका सहमति कार्यान्वयन गर्नु पर्ने र विश्वविद्यालयलाई प्राज्ञिक उन्नयन तथा अनुसन्धान केन्द्रको रुपमा विकास गर्नु पर्ने आंशिक प्राध्यापकहरुको माग रहेको छ ।

आंशिक प्राध्यापकहरुले आफुहरुको माग पुरा गर्नको निम्ति पटक–पटक दबाब दिदैं आएका छन् । क्याम्पसमा कार्यरत आंशिक प्राध्यापकहरुलाई करार सेवामा नियुक्ति दिन माग गर्दै उनीहरुले २०७६ फागुन ११ गते क्याम्पस प्रमुख होम बहादुर बस्नेतलाई ज्ञापन पत्र बुझाएका थिए । त्यस पश्चात् क्याम्पस प्रशासनसँग भएको वार्तामा आंशिक प्राध्यापकहरुको माग सम्बोधन गर्नको लागि त्रिभुवन विश्वविद्यालय जाने सहमति भएको थियो ।

उक्त सहमति पश्चात् आफुहरुको माग सम्बोधनको कुनै पहल नभएपछि बाध्य भएर देशव्यापी आन्दोलनको क्रममा क्याम्पसमा तालाबन्दी गरिएको आंशिक प्राध्यापक समिति धनकुटा बहुमुखी क्याम्पसका सचिव रमेश श्रेष्ठले बताए । धनकुटा बहुमुखी क्याम्पसमा १४ जना आंशिक प्राध्यापकहरु कार्यरत रहेका छन् । धनकुटा बहुमुखी क्याम्पसका सहायक क्याम्पस प्रमुख दिनेश अधिकारीले क्याम्पसमा तालाबन्दी गरिएको स्वीकार गर्दै उनीहरुले राख्दै आएको माग राष्ट्रिय मुद्दा भएकाले क्याम्पसको तर्फबाट सम्भव नभएको बताए ।