विराटनगर । समुदायस्तरमा कोरोना फैलिएको निश्कर्षसहित पुनः १५ दिने लकडाउनमा गएको विराटनगरमा बुधबार बैंकबाट हुने ‘क्यास’ कारोबारसमेत बन्द गरिएको छ ।
विराटनगर महानगरपालिकाले मंगलबार सूचना जारी गरी ‘बैंक तथा वित्तीय संस्थामा मानिसहरुको अधिक भिंडभाँड भई संक्रमण थप फैलन सक्ने जोखिम भएको’ भन्दै बैंकका टेलर संचालन नगर्न सूचित गरेको थियो । प्रमुख प्रशासकीय अधिकृत इन्द्रमणी पोखरेलले सूचना जारी गर्दै बैंक तथा वित्तीय संस्थाबाट विद्युतीय कारोबार आईपिएसतर्फ सेवाग्राहीलाई प्रेरित गर्न आग्रह गरेका थिए ।
राष्ट्र बैंक विराटनगरका विराटनगरमा २८ वटै वाणिज्य बैंक, विकास बैंक र राष्ट्रिय अनि स्थानीयस्तरका फाइनान्सका शाखा कार्यालय छन् । बुधबार विराटनगरमा बैंकका शाखाहरुमा टेलर संचालन गरिएन । तर, चेक क्लियरिङ, वचत र डिम्याट खाता खोल्ने, केवाईसी अपडेट गर्ने तथा फन्ड ट्रान्सफरको काम भने भईरहेको जनाइएको छ ।
महानगरपालिकाको जनस्वास्थ्य महाशाखाका अनुसार संक्रमणको स्रोत नखुलेका मानिसहरुमा कोरोना देखिएपछि विराटनगरमा समुदायस्तरमा कोरोना फैलिएको हो । बैंकका टेलर नखुलेपछि सेवाग्राहीको चाप कम भएको छ ।