मनलाग्दो पार्किङ गर्नेलाइ इटहरी ट्राफिकको ह्विल लक

इटहरी । मुख्य राजमार्ग ढाकेर नीजि सवारी पार्किङ गर्नेलाइ ट्राफिक प्रहरीले ह्विल लक अभियान चलाएको छ । पटक पटक सचेतना गर्दा पनि अटेर गरेपछि एक नम्बर प्रदेश ट्राफिक प्रहरी कार्यालय इटहरीले राजमार्ग क्षेत्र अन्तरगत पैदल यात्री हिडने स्थानमा मनलाग्दो आफ्नो नीजि सवारी पार्किङ गर्नेहरूको सवारी साधनमा ह्विल लक अभियान चलाएको हो ।

बिहीबार मात्रै ट्राफिक प्रहरीले करीब एक दर्जन मोटर साइकल तथा स्कुटीहरूमा ह्विल लक गरी आवश्किय जरिवाना सहित कार्वाहि गरेको छ । इटहरीको मुख्य राजमार्गहरूमा नीजि सवारी पार्किङ बढेपछि पैदलयात्रीहरू समस्यामा परेको अवस्थालाइ मध्य नजर गर्दै प्रहरीले यस्तो गर्नुपरेको एक नं प्रदेश ट्राफिक प्रहरी कार्यालय इटहरीले जनाएको छ ।

पार्किङ स्थल भन्दा बाहिर सवारी पार्किङ गर्ने जो कोहिको सवारी साधनमा अब ह्विल लक गरिने प्रदेश ट्राफिकका प्रवक्ता डिएसपी लक्ष्मिराज अधिकारीले बताए । यो अभियान पहिले देखि नै जारी रहेको पनि उनले जानकारी दिए । यसो गरिदा राजमार्गका क्षेत्रहरू सफा देखिने र पैदल यात्रीहरूले पनि दुख नपाउने उनको भनाइ छ ।